Қызығы, төрттағандап жүруге әуестер мұны хобби санайды. Ұстанымын ата-анасы құптағандары да бар көрінеді. Солайша өмір салтына айналдырған. Еліктеуді ерсі көрмегендер маскасын өз қолдарымен жасап алып, ұнаған образына енеді. Желікпе жастардың ермегінен пайда тауып жатқандар да бар. Оны сауда нүктелерінен аңғаруға болады. Қазір жануарларша жүріп-тұрамын дегендерге дайын реквизит жеткілікті. Оларға арналған арнайы маскалар саудада бар. Квадробингке еліктейтіндер масканың бағасына қарамай саудасын қыздырып жатқан көрінеді. Бүгінде жасөспірімдердің ғана емес, ересектер тарапынан да сұраныс артқан деседі.
Адамдардың төрт аяқтап жүруіне «квадробика» деген атау қайдан телінді? Тарихын тарқатсақ, квадробика, квадроберинг ұғымының түп-тамыры Күншығыс еліне тартады. Бала күнінен төрт аяқтап жүруді әдетке айналдырған жапондық спринтер Кенити Ито итке еліктегендердің бастауы десек болады. Ол 100 метрге төрттағандап жүгіріп, гиннестің рекордтар кітабына да еніпті. Жапон баласының осы жетістігіне таңырқағандар тренд қылса керек. Бастапқыда Жапония, кейін Америкада квадробикаға әуестенгендер қатары көбейген. Солай әлем айналған еліктеушілік әлеуметтік желі арқылы бізге де жетті.
Ал жат жерден жеткен жастар хоббиіне қатысты психологтер пайымы сан түрлі. Оғаш қылыққа ойын балаларының уақытша әрекеті деп баға берген мамандар да бар. Ерсі қылықпен айналысқан жеткіншек адами құндылықтардан алшақтай бастайды деп алаңдаушылық білдіргендер де аз емес. Tik-tokтан тараған тренд баланың түпсанасына тамырын жаймай тұрып, тез арада тоқтату керек деп пайым айтқандар да болды.
Діни шариғатпен жүретін мемлекет болмасақ та, дәстүр мен имандылықты тең ұстайтын халықпыз. Сондықтан қоғамның осы жат құбылысқа қатысты ортақ көзқарасы болуы қажет.
Квадробиканың қаупі жоғары мінберлерден де айтыла бастады. Мәселен, мәжіліс депутаты Дәулет Мұқаев өзінің депутаттық сауалында мәселеге маңыз берді. Мәжілісмен тіпті жануарларша жүргендердің әрекетін деградация деп дабыл қақты. Сондықтан депутат жануарлардың қимыл-қозғалысын қайталағандарға қарсы күресті қазір бастап, жеткіншектердің желікпе қылығын заңмен тыюымыз керек деп
санайды.
Аружан СЕРІКЖАНҚЫЗЫ,
Шәкәрім университетінің 2-курс студенті
