Іс-шара көрнекті ақын, түрколог, Қазақстанның Еңбек Ері, «ЮНЕСКО қамқорлығындағы Мәдениеттерді жақындастыру орталығы» мемлекеттік музейінің директоры Олжас Сүлейменовтің шығармашылық мұрасына арналды. Биыл оның әйгілі «АЗ и Я» кітабының жарық көргеніне 50 жыл толып отыр. Бұл еңбек өркениет бастаулары мен мәдениеттер арасындағы диалогті гуманистік тұрғыдан түсіндіретін рәміздік туынды ретінде бағаланады.
Дөңгелек үстел барысында қатысушыларға ақынның арнайы бейне құттықтауы ұсынылды. Сондай-ақ Олжас Сүлейменовтің өмірі мен шығармашылығына арналған деректі фильм көрсетіліп, оның гуманистік миссиясы Шығыс пен Батысты сөз өнері, тіл және мәдениет арқылы байланыстырушы рухани көпір ретіндегі рөлі айқындалды.
Іс-шараға Қазақстанның Түркия Республикасындағы елшілігі, ТҮРКСОЙ өкілдері, ЮНЕСКО қамқорлығындағы Мәдениеттерді жақындастыру орталығы мемлекеттік музейі директорының жалпы және ұйымдастыру мәселелері жөніндегі орынбасары Салтанат Әшімова, «Мәдениеттердің өзара әрекеттесу орталығы» қоғамдық бірлестігінің директоры Үмітхан Мұңалбаева, Жоғары мамандықтар университетінің ректоры, профессор, ғылым докторы Қадирхан Сунгуроғлу, Анкара университетінің «TÖMER» орталығының директоры Тимур Гүлтекін, Қазақстан халқы Ассамблеясы республикалық Аналар кеңесінің төрағасы, Президент жанындағы әйелдер істері және отбасылық-демографиялық саясат жөніндегі ұлттық комиссияның мүшесі Назипа Ыдырысқызы, республикалық Достық үйінің басшысы Нұрсәуле Әлтекова, Қазақстанның еңбек сіңірген қайраткері, белгілі журналист Ержан Уайыс, басқа да зиялы қауым өкілдері қатысты.
«ЮНЕСКО қамқорлығындағы Мәдениеттерді жақындастыру орталығы» мемлекеттік музейі директорының орынбасары Салтанат Әшімова бұл жиын Олжас Сүлейменовтің әйгілі «АЗ и Я» кітабының жарық көргеніне 50 жыл толуына ұйымдастырылғанын, ақынның келер жылы атап өтілетін 90 жылдық мерейтойының бастамасы екенін атап өтті. Ол қатысушыларға кітаптың алғашқы түпнұсқасын көрсетіп, жарты ғасырдан кейін қайта басылған нұсқасын және ақынның биыл жарық көрген «Я знаю» атты еңбегін таныстырды.
«Бұл шара – тек дөңгелек үстел немесе көрме ғана емес. Бұл – дәуірлерді тоғыстырған диалог, халықтарды ұйыстыратын тілдің қуаты, адамзаттық ойдың кеңдігі. Олжас Сүлейменовтің шығармашылығы әрдайым бізді биікке, ізгілікке, рухани тереңдікке жетелейді», – деді Салтанат Әшімова.
Көрме аясында жазушының әдеби мұралары көпшілік назарына ұсынылды. Экспозицияда сирек басылымдар мен архивтік материалдар қойылып, оның шығармашылық жолы – «Арғымақтар» мен «АЗ и Я»-ға дейін жан-жақты көрсетілді.
Іс-шара аясында ТҮРКСОЙ ұйымындағы Қазақстанның өкілі Нышангүл Қаратаева «Абай» мерейтойлық медалімен марапатталды. Бұған қоса, «ЮНЕСКО қамқорлығындағы Мәдениеттерді жақындастыру орталығы» мемлекеттік музейінің қызметкерлері ТҮРКСОЙ тарапынан мәдениетаралық диалогті дамытуға қосқан үлестері үшін құрмет грамоталарымен марапатталды.
