Алматыда Денсаулық сақтау министрі Жақсылық Досқалиев, Алматы қаласының әкімі Ахметжан Есімов, АҚШ-тың Қазақстандағы елшісі Ричард Хоугланд және АҚШ Қорғаныс министрлігінің Қауіп-қатерді азайту агенттігінің директоры Кеннет Майерс мырзалар М.Айқымбаев атындағы Қазақ ғылыми карантиндік және зооноздық инфекциялар орталығы базасында болашақта салынатын әлемдік стандартқа сай орталық референс-зертхана (ОРЗ) құрылысының басталуына орай өткізілген шараға қатысты. Бұл жаңа зертхана Қазақстанның ерекше қауіпті патогендерінің қауіпсіздігін күшейтіп, Қазақстан және Орталық Азия ғалымдарының ғылыми ізденістерін арттырмақ.
Мамандардың айтуынша, ОРЗ – адамдар мен жан-жануарлардағы инфекциялық аурулардың диагностикасы жөніндегі еліміздің бас зертханасы, әрі Денсаулық сақтау, Білім және ғылым, Ауыл шаруашылығы министрліктерінің ғылыми практикалық кадрлар даярлайтын, сондай-ақ ғылыми-зерттеудің халықаралық орталығы да болып табылмақ.
– Салынатын орталық референс-зертхананың стратегиялық маңызы өте зор, – деді жиында Денсаулық сақтау министрі Ж.Досқалиев. – Екіншіден, бұл зертхана тек қана қазақстандықтарға ғана емес, бүкіл Орталық Азиядағы қандай да бір инфекция, соның ішінде вирус, бактерия бола ма, оларды өзімізде анықтауға, оның құрамын зерттеуге, сондай-ақ керекті вакцина, басқа қарсы тұратын дәр-дәрмектерді шығаруға мүмкіндік тудырмақ. Негізінен зертхана екі түрлі басты қызмет атқарады. Біріншісі, ғылыми-зерттеу, оқыту болса, екіншісі, Қазақстанда бүкіл инфекциялық, биологиялық қатерлі аурулар осы жерде зерттеліп, қорғалып, сақталады. Зертханада үш салалық министрліктің 250-дей қызметкері ғылыми-зерттеу жұмыстарымен айналысатын болады.
Жаңа зертхананың құрылысын түгелімен АҚШ үкіметі қаржыландырып отыр. Оған 60 млн. доллар қаржы жұмсалмақ. Мұнда жоғары деңгейдегі стандарттар, қауіпсіз және қорғалған биологиялық зерттеудің қазіргі заманғы ең жаңа технологиясы қолданылмақ. 2013 жылы құрылысы аяқталатын орталық зертхана халықаралық деңгейдегі Қазақстан, АҚШ және басқа да дүние жүзінің елдері халықтарының денсаулығының нығаюына өз үлесін қоспақ.
АҚШ Елшісі Ричард Хоугландтың айтуынша, бұл жаңа зертхана аса қауіпті патогендердің қазақстандық коллекциясының қауіпсіздігін күшейтеді және Қазақстан мен Орталық Азиядағы ғалымдардың ғылыми мүмкіндігін арттырмақ.
“Бұл 1993 жылдан бері қолданылып келе жатқан жаппай қырып-жою қаруының қауіпсіздігін төмендету мақсатында Қазақстан Республикасы мен АҚШ арасындағы мемлекетаралық келісімді жүзеге асырудың нақты көрінісі болып табылады”, деген ол одан әрі Қазақстан мен АҚШ-тың қауіпсіздік және қырып-жоятын қарудың барлық түрін жою саласында жиырма жылдан бері бірлесе іс-қимыл жасап келе жатқанын айтты. Бұл орайда екі ел президенттері Обама мен Назарбаевтың Вашингтонда 12 сәуірде өтетін Ядролық қауіпсіздік саммитінде екеуара кездесетіндігі осы тарихи әріптестіктің нақты мысалына айналмақшы.
– Сөз орайында мен АҚШ-тың үш азаматының осы іске қосқан үлесін де бөле-жара айта кетсем деймін. Қазақстан өз алдына тәуелсіздік алған кезеңде американдық сенаторлар Сэм Нанн және Ричард Лугар ядролық, химиялық және биологиялық қарулар өндірген кеңестік бағдарламалардың көбі Қазақстан территориясында сыннан өткенін, оның зардаптары жас ұрпаққа орасан зор қауіп төндіретінін айтып, АҚШ үкіметі мен салық төлеушілерін осы территорияны қатерлі қару қалдықтарынан тазалауға мүмкіндік беретін бағдарламаны қаржыландыру қажеттігіне олардың көздерін жеткізген болатын. Ал үшінші адамға келсем, ол АҚШ-тың қорғаныс министрінің қауіпсіздік мәселесі жөніндегі кеңесшісі Эндрю Вебер деген азамат. Бүгінгі шараның жүзеге асуына оның сіңірген еңбегі бір төбе, – деді ол.
Сондай-ақ, жиында АҚШ Қорғаныс министрлігі Қауіп-қатерді азайту агенттігінің директоры Кеннет Майерс аталмыш нысанның маңыздылығына тоқтала келіп, бұл болашағы зор әлемдік деңгейдегі зертхана болатынына және де ол қазақтар мен және басқа да әлем халықтарының игілігіне, денсаулық саласына қосылған үлес екендігін атап өтсе, Алматы қаласының әкімі Ахметжан Есімов ОРЗ-ның салынуы – мемлекетіміздің және оның басшысы Н.Назарбаевтың жүргізіп отырған саясатының, сонымен қатар екі ел басшыларының экономикалық өзара әріптестік қарым-қатынасының қол жеткізген нәтижесі екеніне тоқталды.
Гүлзейнеп СӘДІРҚЫЗЫ.