Сурет: gov.kz
Қазір оқиғалы туризмді дамытуға жан-жақты көңіл бөлініп келеді. Соның бірі ретінде «kazakhstan.travel» ұлттық туристік порталында іс-шаралардың бірыңғай күнтізбесі жарияланғанын айтсақ болады. Онда туристерді қызықтыратын түрлі форматтағы іс-шаралар енген. Былтыр сол кесте бойынша 137 ауқымды іс-шара өтіп, оның 80%-ы
Астана, Алматы қалаларында ұйымдастырылды. Туризм және спорт министрлігі әкімдіктермен бірлесіп, әр облыста өтетін осындай ірі іс-шараларды тұрақты түрде күнтізбеге енгізіп отыруға ниетті. Министрлікке қарасты Туризм индустриясы комитеті туризм саласындағы жүйелі іс-шараларды жүзеге асыру басқармасының басшысы Нұрбол Байжанов іс-шараларды жыл сайын өткізудің маңызы туралы әңгімеледі.
«Өңірде өтетін іс-шаралар дәстүрге айналып, жұртшылық асыға күтетіндей болуға тиіс. Түрлі атаулы күндерді тұрақты негізде өткізіп, орайы келсе оларды халықаралық күнтізбеге қосу қажет. Содан соң жарнамалау арқылы өңірге шетелден келетін туристердің санын арттыруға болады. Жуырда Туризм және спорт министрі Ербол Мырзабосынов әр аймақта жылына туристерді тартатын кем дегенде бір ауқымды іс-шара өткізуді ұсынды. Осы жақсы бастама өңір туризмін ілгерілетуге оң әсер етеді деген сенімдеміз», дейді Н.Байжанов.
Министрліктің хабарлауынша, елде оқиғалы туризммен қатар, іскерлік туризмді дамытуға да әлеуетіміз жетеді. Бұл бағытта атап айтарлықтай жетістіктеріміз бар. Мысалы, конгрестер мен конференциялардың халықаралық қауымдастығымен белсенді ынтымақтастық орнаған. Есесіне, жыл сайын елімізде ауқымды іс-шара өткізудің мүмкіндігі туып отыр. Кейінгі үш жылда елімізде халықаралық деңгейдегі 21 іс-шара ұйымдастырылды. Биыл IFLA, Walter E. Dandy, ISAAK, IGCGD, New Silk Road Network жыл сайынғы кездесуін қоса алғанда, тағы 5 ірі халықаралық іс-шара өткізу жоспарланған.
Былтыр елімізде 5180 шетелдік делегаттың қатысуымен 14 халықаралық іс-шара өтті. Орта есеппен алғанда қонақтардың әрқайсысы шамамен 4000 АҚШ долларын жұмсаған. Осы іс-шаралардан түскен кірістердің жалпы сомасы 20,7 миллион доллардан асқан. Бұл қаражатқа ұшу, тұру, тамақтану, басқа да шығындар кіреді.
«Астана іскерлік, оқиғалы туризмнің негізгі орталықтарының біріне айналып келеді. Алдағы айларда елордада бірқатар ауқымды халықаралық іс-шаралар өткізу жоспарланған. Мысалы, маусымда АҚШ, Канада, Ресей, Еуропа, Азиядан 500 жетекші маман қатысатын Х дүниежүзілік нейрохирургиялық қауымдастық конгресі өтеді. Шілдеде Назарбаев университеті халықаралық сарапшылар қоғамының конгресін қабылдайды. Оған мыңдаған қатысушы келеді. Тамызда Астана «IFLA» дүниежүзілік кітапхана және ақпараттық конгресін өткізу алаңына айналады. Кітапхана саласындағы ең ірі оқиғаға әлемнің 130-дан астам елінен 4000-ға жуық делегат жиналмақ. Аталған МІСЕ іс-шараны өткізу Астанаға шамамен 2 млн еуро табыс әкеледі деп күтіліп отыр. Жиынтық пайда делегаттардың тұруға, көлікке, тамақтануға, басқа да қызметтерге жұмсаған шығындарынан құралады», дейді Н.Байжанов.
Іскерлік, оқиғалы туризмді ұйымдастыруға Астана қаласы таптырмас орын. Қаланың халықаралық деңгейдегі іс-шара өткізуде тәжірибесі мол. Қонақүйлерінде 10 мыңнан астам жиынтық нөмір қоры бар. 120-дан астам мәдени, ойын-сауық нысаны жұмыс істейді. Сонымен қатар елорда 16 елмен (27 бағыт) тікелей әуе қатынасын орнатқан. Үкімет деңгейінде қабылданған осындай іс-шаралардың нәтижесінде елорданың туристік саласы тұрақты өсім көрсеткен. Айталық, былтыр ішкі туристер саны 10,5 млн адамды құрап, 2023 жылмен салыстырғанда 900 мыңға артқан. Шетелден келген туристер саны – 15,3 млн. Бұл статистикада жұмысқа немесе елде тұрақтап қалуға келгендер есепке алынбағанын да ескерген жөн.
