Айтулы жоба оңтүстік энергоаймақтың энергетикалық қауіпсіздігін арттырып, жаңа қуат көздерін, әсіресе жаңартылған энергия нысандарын қосу үшін жаңа инфрақұрылым негізін дайындауға мүмкіндік береді. 500 кВ «Шу» қосалқы стансасына жиналған БАҚ өкілдері мұнда қолға алынған «Қазақстан БЭЖ Оңтүстік аймағы электр желілерін күшейту» жобасы бойынша атқарылып жатқан ауқымды жұмыспен танысып, мамандардың пайымды пікіріне құлақ түрді.
«KEGOC» АҚ «Алматы ЖЭТ» филиалының директоры Арман Шайхановтың айтуынша, қазір 500 кВ «Шу» қосалқы стансасында жоспарлау жұмыстары аяқталған. Нысанда жаңа желіні қосуға арналған қабылдау порталы орнатылып, 500 кВ кернеулі төрт фазалы реактор құрастырылған. Сондай-ақ мұнда заманауи коммутациялық жабдықты монтаждау жұмысы жүргізіліп жатыр. Ауқымды жоба 2027 жылдың ортасында, яғни белгіленген мерзімінен жарты жыл ерте аяқталмақ.
Жалпы, бұл жоба аясында ұзындығы 475 шақырымды құрайтын «Шу – Жамбыл – Шымкент» жаңа электр жеткізу желісі салынады, сонымен қатар «Шу», «Жамбыл» және «Шымкент» қосалқы стансалары кеңейтіледі. Жобаның жалпы құны – 154,1 млрд теңге. Жұмыстың белгілі бір бөлігі «KEGOC» АҚ-ның өз қаражаты есебінен іске асса, қалған бөлігі «Азия даму банкінің» және «Қазақстан даму банкінің» несиелері есебінен жүзеге асырылады.
«KEGOC» АҚ «Алматы ЖЭТ» филиалы директорының күрделі құрылыс жөніндегі орынбасары Ерік Серікбайұлының айтуынша, мұнда отандық өндірушілерді қолдауға ерекше мән беріліп отыр.
«Жергілікті қамту үлесі 67%-ға жуық. Барлық жобалық және құрылыс-монтаждау жұмысына отандық компания атсалысып жатыр. Автотрансформаторлар, реакторлар, кабельдік өнімдер, металл конструкциялары мен темірбетон бұйымдары толықтай отандық зауыттардан жеткізілді. Ал ажыратқыштар мен релейлік қорғау жүйелері секілді заманауи жоғары технологиялық жабдықтар «Siemens», «GE Grid», «Prysmian Group», өзге де жетекші әлемдік компаниялардан сатып алынды», дейді ол.
Жобаны іске асыру нәтижесінде Алматы, Жамбыл, Түркістан, Қызылорда, Жетісу облыстары мен Алматы қаласы үшін сенімді энергетикалық инфрақұрылым қалыптасады. Бұл өз кезегінде тұтынушыларды үздіксіз электр энергиясымен қамтамасыз етіп қана қоймай, Күн және жел электр стансаларын қоса алғанда, жаңа генерация нысандарын интеграциялауға мүмкіндік береді. Ірі жобаға қаржылай қолдау көрсеткен «Азия даму банкінің» еліміздегі тұрақты өкілдігінің басшысы Кумар Утсав жұмыстың нәтижелі болатынына күмән келтірмейді.
«Жоба аясында «KEGOC» АҚ-ның серіктесі болғанымызға қуаныштымыз. Бұл бастама жаңартылатын энергия көздерінің үлесін арттыруға, оларды энергетикалық жүйеге интеграциялауға және көміртегі бейтараптығына қол жеткізуге бағытталған. Сондай-ақ жоба «Азия даму банкі» мен Қазақстан арасындағы 2024–2027 жылдарға арналған серіктестік стратегиясына толық сай келеді», дейді ол.
Жалпы, «KEGOC» АҚ елдегі Біртұтас электр энергетикалық жүйесінің Жүйелік операторы міндетін атқарады. Компанияның негізгі қызмет түрлері табиғи монополия саласына жатады. Балансында жалпы ұзындығы шамамен 28 мың шақырым болатын 220-1150 кВ кернеулі электр жеткізу желілері және трансформаторларының қуаты 38,9 ГВА құрайтын 83 электр қосалқы стансасы бар.
Жамбыл облысы
