Ал енді Бердібек Мәшбекұлы журналиске берген бір сұхбатында: «Көңіліңнің тыныштығы үшін және өзіңді бақытты сезіну үшін ұлтқа адал қызмет етуден асқан абыройлы іс жоқ. Саналы өмірімді осы жолға арнаған адам ретінде батыл айта аламын: елге қызмет ету ісінде демалыс жат. Десе де еліңе пайдалы болу дәйім креслода отыру деген сөз бе? Әкімнің орынтағынсыз да жұрттың болашағы үшін күресуге болатынын талай тұлғалар дәлелдеп өткен. Қол қусырып қарап отыра алмайтынымды өзің де айтып қалдың. Әрине, солай. Тұғырдан тайып тұрғандай болып сөйлегеннен Құдай сақтасын. Әлі де болса, еліме еңбек сіңіремін деп ойлаймын. Себебі мен өзімді жұмыс істегенде ғана бақытты сезінемін. Жалпы, кез келген адамның пешенесіне өзінің сүйікті ісімен айналысуды жазса, жер бетінде бақытты жандар көбірек болатынына бәс тігемін», деген өмірлік танымын ашып айтады.
Ел үшін ерен еңбектің, қайтпас қайсарлықтың, намыс пен ардың жоғары үлгісін көрсете білген екі тұлғаның арасында табиғи тылсым байланыс бар екенін жоққа шығару қиын. Сол Әбіш ағамыз Бекеңнің алпыс жасына арнап кең көлемді мақала жариялады. Сөзінің соңын «Бердібек Сапарбаев бұрынғысынша вахтада. Әрбір кешіңіз табысты аяқталып, әр таңыңыз сәтті басталғай, алғадай азамат» деген батамен аяқтапты.
«Өмір деген зырылдап өтіп кеткен күндердің тізбесі емес, солардың ішінде өшпестей есте қалғандары ғана» депті ғой бір данышпан. Маған марқұмды еске алуға арналған барлық өңірдегі шараларға қатысу бұйырды. Сондағы халықтың ыстық ықыласы, атқарған ісіне берген бағасы таусылып болмады ғой. Астанадағы аста Бердібек Мәшбекұлына «мемлекетшіл тұлға», Алматыдағы мәдени қауым «ұлт зиялыларымен сабақтас тұлға» деп баға берді. Астана, Алматы, Қызылорда қалаларында өткен жиындардан кейін Шығыс Қазақстан облысының әкімі болып жаңадан тағайындалған Ермек Көшербаев бастама көтеріп, Бердібек Мәшбекұлына арнап іс-шара өткізді. Б.Сапарбаев Шығыс Қазақстан облысы әкімдігіне келген кезден бастап, жергілікті проблеманы еңсеруге кіріседі. Тұрғындардың айтуынша, етігімен су кеше жүріп табиғи апаттардың қиыншылығын реттей білген. Ұлттық құндылықтарды дәріптей отырып, Шығыстың тарихи шырайын кіргізе алады. «Алтай – түркі әлемінің алтын бесігі» атты халықаралық кеңес бүкіл түрік дүниесін дүр сілкіндіреді. Абай бастаған қазақ ұлтының мақтаныштарының ескерткіштері әрбір қазаққа рух беріп тұр. Аллея бойындағы Абайдың қара сөздерін оқыдық, қала биігіндегі «Қазақстан» деген атауды көріп толқыдық. Тұрғындар қаладағы орталық мешіттің пайдалануға берілудегі облыс басшысының жергілікті тұрғындармен бірге білек сыбана кіріскенін аңыз қылып айтып берді. Өскеменді аралау барысында ұлттық намысты жігерлендірер жасампаз істердің нәтижесіне көз жеткіздік.
Бұрынғы Оңтүстік Қазақстан облысының орталығы Шымкент қаласында үлкен астың басында шырайлы шаһар әкімі мен зиялы қауым өкілдері Бердібек Мәшбекұлының жұмысына жоғары баға берді. Өңірдің өзекті проблемаларын түрлі кедергіге қарамастан, айналасындағылармен кеңесіп шешу жолдарын таба білгенін ел ағалары ерекше атап өтті. Сол кездегі жалақының, зейнетақының, түрлі әлеуметтік жәрдемақының кешеуілдеуіне, газдың, жарықтың жоқтығына наразы халықтың жағдайын жақсарту оңай іс емес еді. Оның үстіне тұрғындардың өмір сапасына тікелей әсер ететін құрылымдар жекешеленіп, елдік мүддеден жеке мүдде басым түсе бастаған уақыттың сынына Бердібек шыдас бере алды деген сөздер құлаққа шалынды. Облыстағы электр энергиясын, жылу мен газды өндіретін, оны жеткізетін кәсіподақтарды жекешелендіру жұмысының заңдылықтары қатаң тексеріліп, 3,2 млрд теңгенің мүлкі мемлекетке қайтарылыпты. Кейбір басшылар құрметтемек түгілі, атын айтуға батылы бармай жүргенде, республикамыздың біртуар азаматы Асанбай Асқаровқа «Құрметті азамат» атағын беріп, астына автокөлік мінгізгенін ерлікке балағанын да естідік. Үйсіз-күйсіз жүрген БАҚ, шығармашылық ортаның өкілдеріне күрделі жөндеуден өткен үйден пәтер бергеніне зор ризашылық білдірді. Біршама зиялы қауым өкілі Түркістанның 1500 жылдығын ЮНЕСКО аясында атап өту іс-шараларына елді жұмылдыра білгенін еске алысты. Еліміздің танымал тұлғаларының басын қосып, халықаралық «Парыз» қорын құрып, 2,3 млрд теңге қаржы жинаған. Әрбір тиынын ұқыпты жұмсап, түркі әлемінің рухани астанасы Түркістанның атын әлемге таныта түскен.
Ақтөбе қаласына Сыр өңірінен барған делегацияны сол кездегі облыс басшысы Ералы Тоғжанов арнайы қабылдады. Бердібек ағамызға тапсырып үлгермеген «Ақтөбе облысының құрметті азаматы» атағы белгісін отбасына тапсырды. Іс-шаралар арасында өзгерген, жаңарған, сәулеттендірілген қаланы көрдік. Қаз-қатар салынған «Шығармашылық академиясы», «Өнер орталығы», «Жұбановтар әлемі», «Анаға тағзым», облыстың жедел жәрдем қызметі, облыстық мұражай, неке сарайы, жекпе-жек сарайы, мұз айдыны, теннис орталығы, т.б ғимараттар алыстан көз тартып, көңілге қуаныш ұялатады екен. Жаңадан бой көтерген шағын аудандардың сәулеті де ерекше. Сонымен бірге аудандандарды абаттандыру жұмыстарының нәтижелеріне көз жеткіздік. Іс-шара кезінде сөз алған облыс тұрғындары өздері «нар тұлға» деп атайтын Бердібек Мәшбекұлының кезек күттірмес мәселелерді елмен кеңесе отырып шешкеніне ризашылық білдірді.
Арнайы шақырумен Жамбыл облысында болдық. Сол кездегі облыс әкімі Нұржан Нұржігітов және тұрғындардың пікірлерінен Қордайдағы қақтығыс кезінде адам өлімінен ашынған тұрғындарды сабырлыққа шақырып, сабасына түсіру оңай болмағанын терең сезіне түстік. Расында, ел ішіндегі ахуалды байыптап, ынтымақтастыққа зиян келтірмей әділет таразысын тең ұстау қашаннан келе жатқан игі дәстүр. Қалыптасқан шиеленісті шешу үшін әуелі көпшіліктің көкірегіне осы сенімді ұялату керек. Сондықтан да болар, Мемлекет басшысы Бердібек Сапарбаевты осындай сын сағатта Жамбыл облысына әкімдікке тағайындаған.
Жамбылдағы қызмет уақыты жаһанды жайлаған «коронавирус» індетімен сәйкес келді. Осы бір сындарлы сәтте, әлемде алғашқы бес мемлекеттің қатарында отандық вакцинаны шығарудағы еңбегі өлшеусіз екені белгілі. Бұл жөнінде Президенттің ғылым мен инновация жөніндегі кеңесшісі Күнсұлу Закарья: «Кешегі пандемия кезінде халық денсаулығына араша болған отандық «QazVac» вакцинасының шұғыл шығарылуында Бердібек Мәшбекұлының зор үлесі бар екенін екінің бірі біле бермейді», деді.
Қандай қиындық, кедергі болса да үйлестірілмейтін, реттелмейтін проблема, шешілмейтін түйін жоқ екендігіне, тек соны үйлестіре, ұйымдастыра алмайтын басшылар бар екеніне осындайда көзіміз жетеді.
Облыс әкімінің әлеуметтік мәселелер жөніндегі орынбасары ретінде ол кісінің қызметтік жиналыстарына қатысып, сапарында бірге жүру бақыты бұйырды. «Адамдағы ынсап, әділет, мейірім үшеуін қосып айтқанда «Ұждан» деген ұғым шығады» деген Шәкәрімнен қалған сөз бар. Сол ар-ожданды жоғары ұстай білген ұстаздың өмір тәжірибесін зерттеп, үлгі қылу – бізге мұра болмақ. Қайраткер өнегелі өмірімен бүгінгі және кейінгі ұрпаққа елге адал еңбек етуді аманаттап кетті.
Наурызбай БАЙҚАДАМОВ,
Сенат депутаты
