Жаңаөзен қаласына қарасты Кендірлі зауытында теңіз суын тұшыту үдерісінің басталуы өңір тұрғындары үшін үлкен жаңалық болды. Ауызсу тапшылығын теңіз суын тұшыту және жерасты су көздерін пайдалану арқылы еңсеруді басым бағыт еткен Маңғыстауда негізгі жобалардың бірі жобалық қуаты тәулігіне 50 мың текше метр болатын «Кендірлі» теңіз суын тұшыту зауытын салу болатын.
Кәсіпорындағы құрылыс жұмысы биыл мамырдың аяғында бітті. Суды тұшыту, тұзсыздандыру және минералдандыру цехтары, сорғы стансасы, екі қосалқы станса, жөндеу-механикалық цехы, гараж, қоймалар, зертхана мен өрт сөндіру бекеті, қазандық салынды. Әрбір нысан үшін ең қажетті нәрсе инженерлік-коммуникациялық инфрақұрылым десек, зауытқа ұзындығы 80,1 шақырым электр беру желісі, жалпы ұзындығы 201,4 шақырым екі тармақты магистралды су құбыры, 48,1 шақырым газ құбыры, 40,1 шақырым автожол салынып, жобаның теңіз бөлігі бойынша теңіз түбіндегі траншеяға полиэтилен құбырлары төселді. Кәсіпорында әлемнің жетекші өндіруші компанияларының озық технологиялары қолданылады.
Іске қосу-баптау іс-шаралары жүріп жатқан зауытта алдымен технологиялық жабдықтардың бүкіл циклі реттелді. Бұл – теңіз суын тұшытуға арналған өндірістік желі тексеріледі және жуылады деген сөз. 72 сағатқа созылатын бұл үрдістен соң сынақ іс-шаралары сәтті аяқталған кезде зауыт жұмыс режіміне көшеді.
Зауыттың суды тазарту және тұшыту жұмысы күрделі. Мамандардың айтуынша, алдымен зауыттан 730 метр қашықтықта теңіз үстінде орналасқан арнайы су жинайтын құрылғы арқылы тереңдігі 12 метрлік құдыққа келіп түскен теңіз суы қондырғылардың көмегімен құбыр арқылы кәсіпорынға жетеді. Тұшыту цехында лайдан тазартуға және басқа заттарды жоюға бағытталған бірқатар процедурадан өткен су өздігінен тазартатын сүзгілерге жіберіледі. Осыдан кейін су ультра сүзгілеу үдерісінен өтеді.
Бұл тәсіл су құрамындағы органикалық заттарды 70–75%-ға дейін төмендетуге және барлық қоспаны, соның ішінде бактерия, бір жасушалы балдыр және басқа да элементтерді толық жоюға ықпал етеді. Сондай-ақ кері осмос технологиясы су құрамын минералды қоспалардан тазартып, 99,5% тұшытуға мүмкіндік береді. Ал тұщы суды жоғары сапаға жеткізу үшін реминерализация процесі жүргізіледі. Хлорланғаннан кейін ол су ауызсу резервуарларына жіберіледі.
Көптен күткен Кендірлі су тұшыту зауыты толық жобалық қуатына енгенде өңірде ауыз су мәселесіне белгілі мөлшерде серпін бермек.