Фото: istockphoto.com
Oxford Academic сайтында жарияланған зерттеуге сәйкес, алдағы 30 жыл ішінде жүрек-қан тамырлары ауруларынан болатын өлім-жітім 73%-ға көбейіп, 36 миллионға жетуі мүмкін. 2022 жылы бұл көрсеткіш 19,8 миллион адамға тең болып, әлемдегі жалпы өлімнің шамамен үштен бірін құрады.
Ал, мүгедектікке бейімделген өмір жылдары (DALY) бойынша жалпы ауру жүктемесінің 55%-ға өсуі болжанып отыр. Әсіресе, 2-типті қант диабеті бар науқастар арасында созылмалы жүрек жеткіліксіздігі басты өлім себептерінің бірі болып саналады.
Қазақстанда соңғы онжылдықта қан айналымы жүйесі ауруларының таралуы артқанымен, профилактика мен кардиологиялық орталықтарды дамыту арқасында стандартталған өлім-жітім шамамен 37%-ға төмендеген. Бұл көрсеткіштер кардиологиялық қызметтің тиімділігін дәлелдейді.
«Денсаулық» ұлттық қауымдастығы ЗТБ басқарма төрағасының орынбасары, дәрігер Гинтаутас-Юозас Кентра жүрек-қан тамырлары ауруларының өсуі дәрігерлерді де, қоғамды да алаңдатып отырғанын айтты. Оның сөзінше, жүрек саулығын сақтау жастық шақтан басталуы қажет.
«Салмақты бақылау, темекіден бас тарту, дене белсенділігін арттыру, тұрақты тексеруден өту және бүйрек жағдайына көңіл бөлу – осы шаралар алдағы онжылдықтарда миллиондаған мезгілсіз өлімнің алдын алуға мүмкіндік береді», деді дәрігер.
