Облыстық дін істері басқармасының ұйымдастыруымен өткен «Ойлан, тап!» интеллектуалды ойыны сол игі істердің бірі. Сайыс үш кезеңнен тұрды. Сұрақтар еліміздің және Түркістан облысының тарихы, әдебиет, ұлттық салт-дәстүрлер, дін саласындағы заңнамалар және спорт тақырыптарын қамтыды. Қатысушылардың білімі мен тапқырлығын кәсіби қазылар алқасы бағалады. Тартысқа толы өткен интеллектуалды сайыстың жеңімпазы – Отырар ауданының құрама командасы 500 000 теңгені иеленді. Жүлделі ІІ орынды Сайрам ауданы және «Дін мәселелерін зерттеу орталығы» КММ командалары алса, үшінші орын Ордабасы және Төлеби аудандарына бұйырды. Сонымен қатар командалар арасында ұлттық нақыштағы киім үлгілерімен ерекшеленген Жетісай, Сарыағаш, Созақ аудандарының және «Балаби қари» құран жаттау орталығының құрамалары «Көрермен көзайымы» аталымына қаржылай сыйлықтарға ие болды.
Жүлдегерлер мен жеңімпаздарды марапаттаған облыс әкімінің орынбасары Ертай Алтаев интеллектуалды сайыс қатысушылардың зияткерлік әлеуетін арттырып, шығармашылық ойлау қабілетін дамытып қана қоймай, олардың отансүйгіштік сезімін, ұжымдық рухын арттыратынын атап өтті.
Сондай-ақ Түркістанда Рухани келісім күніне орай діни конфессиялар арасындағы өзара түсіністік пен достықты нығайту, саламатты өмір салтын насихаттау мақсатында спартакиада өтті. «Астана» спорт кешеніндегі сайысқа облыс аумағындағы діни конфессия өкілдері және дін саласындағы мекеме қызметкерлерінен құралған 8 команда қатысты. Жарыс жеңімпаздарына арнайы дипломдар мен сыйлықтар табысталды.
Түркістан облысы
