Құрылыс өткен жылы басталған еді. Заманауи жоғары кернеулі жабдықтар орнатылған қосалқы стансада қуатты екі трансформатор, кернеуі 110 киловольттық, ұзындығы 300 метрлік 6 тізбекті әуе желісі, 4 анкерлі тірек, 5 көлік сиятын автотұрағы бар жөндеу базасы, әкімшілік-тұрмыстық корпус салынды.
– Жобаға отандық «Alageum Electric» компаниясының жоғары вольтты жабдықтары пайдаланылды. Нысан толықтай іске қосылған соң, бұл жерде «Батыс Қазақстан аймақтық электр желілік компаниясы» мамандары тұрақты түрде қызмет етеді. Құрылысты сапалы орындап шыққан мердігер ұйым қызметкерлеріне алғыс айтамын. Бұл жоба – өңіріміздің инфрақұрылымдық дамуына серпін беріп, тұрғындардың тұрмыс сапасын жақсартуға айтарлықтай үлес қосады, – деді нысанның ашылу салтанатына арнайы келген Батыс Қазақстан облысының әкімі Нариман Төреғалиев.
Жаңа станса қала іргесіндегі өндірістік аймақтарды электрмен қамту ісін де сенімді ете түсті. Жобаға республика қазынасынан 3,2 млрд теңге, жергілікті бюджеттен 190 млн теңге қаражат бөлінген.
Батыс Қазақстан облысы
