Сурет: ptk-astana.edu.kz
Кәсіптік-техникалық колледжі 16 жылдан бері электр және газбен дәнекерлеуші, токарь, жол-құрылыс машинисі, техник-механик, электр маманы, жалпы құрылыс шебері, сондай-ақ автокөлік жөндеу слесары, жабдықтарды реттеуші, кран машинисі сияқты сұранысқа ие мамандарды даярлайды.
Іс-шара барысында білім мекемесінің «АЛКОН+» және «Астана Тазалық» ЖШС сияқты кәсіпорындармен ынтымақтастығына баса назар аударылды. Алдымен компания өкілдері жастарға өздерінің қызметі туралы баяндады. Сонымен бірге теориялық білімді өндірістік тәжірибемен ұштастыратын дуалды оқытудың маңызына тоқталды.
Айталық, «АЛКОН+» компаниясы – бас шаһардағы қасбеттік дизайн саласына маманданған іргелі кәсіпорынның бірі. Құрылыс саласында айтарлықтай жетістікке қол жеткізген. Бүгінге дейін біраз студент осы кәсіпорында тәжірибеден өтіп, өз мамандықтарының қыр-сырын үйренген. Компанияның бас директоры Бейсен Жолболдиев аталған оқу орнымен арадағы тығыз байланыс бірнеше жылдан бері жалғасып келе жатқанын айтты.
«Шынында да, дуалды оқытудың маңызы ерекше. Өйткені студенттер уақытының 65 пайызға жуығын өндірісте өткізеді. Бұл теориялық білімді дамытып, жастарға қызмет жолында жетістікке жетуге мүмкіндік береді. Біз жас мамандарды жұмысқа тартуға мүдделіміз. Оларға тек тәжірибеден өтуге ғана емес, оқуын аяқтағаннан кейін жұмыс орнын ұсынуға да дайынбыз», деді ол.
Сондай-ақ «Астана Тазалық» кәсіпорны да колледжбен өте жақын байланыста. Компанияның HR менеджері Сымбат Хакімова студенттер санын шектемей, оларды кез келген уақытта тәжірибеден өткізуге дайын екенін жеткізді.
Мазмұнды іс-шара соңында өндірістік тәжірибеде үздік нәтиже көрсеткен студенттерге Алғысхат табыс етілді.
Қайсар Құсайын
