Суретті түсірген – Жеңіс ЫСҚАБАЙ
Мемлекет басшысы халыққа арнаған Жолдауында жер ауыл шаруашылығы саласына инвестиция тартудың басты кепілі екенін, оны тиімді пайдаланудың маңызын ерекше атап өткен еді. Осы орайда Жетісу облысында «Заң бойынша жер» қанатқақты жобасы іске асырыла бастайды. Ауыл шаруашылығы жерлерін бөлудің барлық үдерісі цифрландырылған бұл жобаны әділдік пен ашықтықты қамтамасыз ету мақсатында облыстық прокуратура жер қатынастары басқармасы бірлесіп қолға алған.
Жоба республикада бірінші болып алдағы қараша айында Сарқан ауданында жүзеге асырылмақшы. Ол өз тиімділігін көрсетсе, келесі жылдан бастап барлық ел аумағында іске қосылады деп жоспарланған. Осы ретте Жетісу облыстық Жер қатынастары басқармасының басшысы Ермек Әпеков қанатқақты режімдегі конкурсты өткізудің ерекшеліктері туралы кеңінен түсіндіріп берді.
«Жергілікті жерде кемі 5 жыл тұрған азаматтар мен кәсібін бастағанына үш жылдан аспаған кәсіпкерлерге артықшылық беріледі. Оған қоса егістік жерлер үшін техникаларының қуаттылығы, жайылым жерлер үшін мал басының саны, соның ішінде техника мен малдың кемінде 12 ай бұрын тіркелгендігі есепке алынады. Тіпті шаруашылықтағы қызметкерлер саны, олардың зейнетақы мен салық аударымдарының болуы да ескеріледі. Осының бәріне белгілі деңгейде ұпай беріледі. Бұл түптеп келгенде ауыл шаруашылығын тиімді дамытуға бағытталып отыр», дейді Е.Әпеков.
Басқарма басшысының айтуынша, электронды конкурстың өткізілу үдерісіне жергілікті атқарушы органның қызметкерлері қатыспайды. Сондай-ақ онда бұрынғыдай инвестиция көлемі ескерілмейді. Оған қоса ірі жер көлемінің бір қолда шоғырлануына да жол бермеу қарастырылған. Сондай-ақ конкурсқа қатысушылар түрлі анықтама мен құжат жинап әуреленбейді, себебі цифрлық жүйе Ауыл шаруашылығы, Әділет, Қаржы, Еңбек және халықты әлеуметтік қорғау министрліктерінің деректер базасымен интеграцияланған.
Қазіргі қолданыстағы конкурс тікелей комиссия мүшелерінің қатысуымен, яғни адам қолымен атқарылатындықтан, онда жемқорлық тәуекелдері жоқ дей алмаймыз дейді облыстық прокуратура өкілдері. Олар талдау барысында ауыл шаруашылығы жерлерін бөлу мәселесі қоғамда жиі көтерілетінін анықтаған.
«Бұл орайда біз Жер қатынастары басқармасымен бірігіп, конкурс өткізудің цифрлық жүйесі жобасына кірістік. Бұл жерді бөлудің ескірген тәсілінен бас тартып, оны толық автоматтандыруға қол жеткізуге бағытталған. Конкурсқа рейтингтік-балдық жүйе енгізіліп, оның қорытындысы адамның қатысуынсыз бірден жарияланады. Бұл енгізілген жаңашылдық жемқорлықтың алдын алуға, бизнесін жаңа бастаған және әлеуметтік бағыттағы кәсіпкерлерді қолдауға, бизнес өкілдерінің өз ісін ашық жүргізуін ынталандыруға, шаруа қожалықтарында істейтін жұмысшылардың құқығын қорғауға оң ықпалын тигізеді деген сеніміміз бар», деді облыстық прокуратураның Қоғамдық мүдделерді қорғау басқармасы бастығының орынбасары Б.Ерұзақов.
Атап өтсек, Жер кодексіне сәйкес облыста нысаналы мақсаты мен пайдаланылу режімi бойынша жер аумағы 7 санатқа толыққанды бөлінген алғашқы аймақ Сарқан ауданы болғандықтан, қанатқақты жобаға қатысушы ретінде таңдалынып отыр. Жерді аумақтарға бөлу қазір тағы 4 ауданда – Ақсу, Көксу, Ескелді, Кербұлақ аудандарында жүргізіліп жатыр.
Жетісу облысында жыл басынан бері жер бөлуге қатысты 28 конкурс өткізілген. Оған 659 адам қатысып, оларға 84 мың гектардан астам жер бөлініп берілген.
Жетісу облысы
