Шаруашылық • 31 Мамыр, 2024

Қазақстанда әлемдегі ең үлкен жылыжай салынады

78 рет
көрсетілді
2 мин
оқу үшін

ҚР Премьер-министрі Олжас Бектенов «ЭКО-мәдениет» Агроөнеркәсіптік холдингінің президенті Александр Рудаковпен ауыл шаруашылығы саласындағы ынтымақтастықты талқылады. Күн тәртібінде аграрлық азық-түлік қауіпсіздігін қамтамасыз ету бойынша бірлескен жобалардың бар екені айтылды, деп хабарлайды Egemen.kz ҚР Үкіметінің баспасөз қызметіне сілтеме жасап.

Қазақстанда әлемдегі ең үлкен жылыжай салынады

Фото: fruitart.kz

Айта кету керек, «ЭКО-мәдениет» - тұрақты дамудың 13 жылдық тарихы бар экологиялық таза жабық топырақ көкөністерін өндіретін ірі агроөнеркәсіптік холдингтердің бірі. Бір жыл ішінде холдинг өндірген өнім көлемі 300 мың тоннадан асады. Өз кезегінде, Қазақстанда құрылған инвестициялық ахуал және нақты өндірісті қолдау шаралары ел аумағында экономика үшін маңызды жобаларды іске асыруға ықпал етеді.

Холдинг Түркістан облысы Келес ауданында жылыжай кешенінің құрылысын бастады. Қазіргі таңда жылына 28 мың тоннадан астам қызанақ өндіретін 51 га жер учаскесінде жылыжай құрудың бірінші кезеңі жүзеге асырылып жатыр.

Кездесуге қатысушылар 500 га жерді қамтитын жылыжай кешенінің аумағын кеңейту жобасын талқылады. Бұл жыл бойы 240 мың тоннадан астам көкөніс өсіруге мүмкіндік береді. Өндірілетін өнім ішкі нарыққа да жеткізіледі, сондай-ақ логистикалық және тарату орталықтарының қазірдің өзінде пысықталған арналары арқылы шетелге экспортталады.

Жобаның бірінші кезегін келесі жылдың соңына дейін пайдалануға беру жоспарланып отыр.

Александр Рудаковтың айтуынша, бұл жылыжай салынып бітсе, әлемдегі ең үлкен жылыжайға айналады. Онда 7 мың жұмыс орнын ашу көзделді. «ЭКО-мәдениет» холдингі жергілікті тұрғындар үшін бәсекеге қабілетті еңбек жағдайларын жасап, сондай-ақ әлеуметтік жауапкершілік шеңберінде өңірдің дамуына барынша үлес қосады.

Бұл ретте Үкімет басшысы агроөнеркәсіптік кешенді дамытудың маңыздылығын атап өтті.

«Азық-түлік қауіпсіздігі, тұрғындарымызды сапалы және арзан өнімдермен қамтамасыз ету - Үкімет жұмысының басты басымдығы. Өсіп келе жатқан демографиялық көрсеткіштерді ескере отырып, бүкіл әлемде азық-түлікке деген қажеттілік тұрақты түрде артып келеді. Біздің нарықты қамтамасыз етуге және өнімді экспорттауға барлық мүмкіндігіміз бар. Бүгін біз ауыл шаруашылығы саласын ішкі қажеттілікті толығымен жаба отырып және экспорт көлемін ұлғайтуды жалғастыра отырып, жаңа деңгейге көтеруді мақсат етіп отырмыз. Осы бағытта біз инвесторларды тартуға мүдделіміз және ауқымды жобаларды іске асыруға қолдау көрсетуге дайынбыз», деді Олжас Бектенов.

 

Қырмызы ЖҰМАҒАЛИҚЫЗЫ,

ЕҰУ студенті