Е.Бөкетов атындағы Қарағанды университеті филология факультетінде білім алған маман жиырма алты жыл осы мектеп-лицейде сабақ беріп келеді. Ізденімпаз педагог әр сабағына жоба қорғап шығатындай дайындалады.
– Алдымда білім алып отырған әр оқушы – бір-бір жобам, – дейді. – Біздің пәнде ең алдымен баланың тілге, әдебиетке қызығушылығы болу керек. Шыны керек, гаджетке байланған жастардың назарын аудару оңай емес, әрине. Гаджетті жоққа шығармай, сол арқылы да балаларды кітап оқуға баулимыз. Рухани іс-шаралар да оқушылардың ынтасын арттыруға ықпал етеді, – дейді педагог.
Әсем әдебиетті ғылымиландыру бағытында үздіксіз жұмыс істеп жүр. Неге десеңіз, тілдің, әдебиеттің теориясын білмеген оқушы жауабын жөнді бере алмайды деген ұстанымда. Сол себепті де әр ізденістен ғылыми негіз көреді.
– Көпшілік мұғалім оқушының жауабын өзі айтып қойып жатады. Бала сұрағыңызға дұрыс жауап берсін, қате жауап берсін, өзі жеткізуі керек. Баланың ойын мұқият тыңдау керек және өзіңізбен бір деңгейде емін-еркін әңгімелесу керек. Сонда баланың айтары анық болып, сабағыңыз сәтті өтеді. Қазіргі балаларға құр сөз емес, креатив керек. Жан-жақты болу қажет. Өйткені балалардың ойы күрделеніп барады, – дейді мұғалім.
Иә, ұжымдағы ғана емес, аймақтағы әріптестері оны шынымен де жаңашыл деп таниды. Былтырғы оқу жылында аттестациядан сәтті өтіп, педагог-зерттеуші мәртебесін растап алған. Мұғалімдерге қатысты өтетін ғылыми-әдістемелік конференция, түрлі тренингтен қалыс қалмайды.
Әрине, ұстаздың көрсеткіші шәкірттерінің жетістігімен өлшенеді. Оның шәкірттері түрлі конкурсқа, интеллектуалдық марафондарға, олимпиадаларға, ғылыми-тәжірибелік конференцияларға қатысып, мектептеріне олжа салып жүр.
Ә.Берікқызының біз біле бермейтін тағы бір қыры бар. Әртістік. Өзі мектебіндегі «Сахна сыры» атты үйірмеге жетекшілік етеді. Балалардың жан дүниесіне ене алатын екінің бірінің қолынан келе бермейтін қасиеті мен балдырғандарды кейіпкер әлеміне ендіре алатын әртістік қабілетіне әріптестері қайран қалып жатады.
– Бала болған соң олар көңіл күй мен сезімге жақын. Сахна деген кие. Сахна деген өмір. Сол арқылы оларға рухани тәрбие береміз. Түрлі қойылымдар қоямыз. Жалпы, мектептегі мәдени іс-шараларға оқушыларым қалыс қалмайды, құлшыныспен қатысады. Бұл да керек, – деген пікірімен бөлісті кейіпкеріміз.
Мұның бәрі бір ғана еңбек деген шеңбердің шекарасына топтасады. Сол маңдай тер еңбегінің ақталғаны – 2018 жылы Ыбырай Алтынсарин атындағы төсбелгіні тағынғаны. Жо-жоқ, қателесеміз. Әсем ұстаз олай ойламайды. «Еңбегімнің жанғанын оқушыларымның жарқын жетістіктерімен өлшеймін», дейді. Расымен, үздік ұстаздың жүрек түкпірінде «шәкірттерім өзімнен озса» деген ізгі тілегі жатады емес пе?..
Ұстаз – отбасында аяулы жар, қамқор ана. Жолдасы Манарбек Қызыров әскери қызметін абыроймен атқарып, сол саладан зейнетке шыққан. Қазір жеке кәсіппен айналысады. Ұлдары Бекежан Болашақ колледжінде үшінші курста оқып жүр. Дене шынықтыру пәнінің мұғалімі болмақ ниеті бар. Ал ерке қыздары Інжу – анасы еңбек ететін мектептің 7-сынып оқушысы. Қыздары да анасының ізімен жүріп, мұғалім болғысы келеді. Бұл шаңырақ үшін ұстаздың қадірі тым биікте.
Қарағанды облысы
