Аула клубындағы ауқымды істер

Жастар саясатын жүзеге асыруда жергілікті билік тиімді шаралар қабылдауда. Осы орайда жастардың бос уақытын ұйымдастыру мәселесімен айналысып, дарынды өскелең ұрпақтың әлеуетін ашатын «Ақтөбе жастары» КМК өз жұмысын бас­тады. Облыс орталығындағы аула клубы Мемлекет басшысының тапсырмасын орындау мақсатында құрылған болатын. Аула клубының ғимаратын «Батыс-2» ауданы «Степ­ной» тұрғын үй алабы №6 «Г» үйінің құрылысын салған «Сол­лерс» ЖШС мемлекеттік мен­шікке тегін берді. Клубтың аума­ғы 450 шаршы метрді құрай­ды, «ҚИК» бағдарламасымен са­лынған аула клубы тұрғын үйдің бірінші қабаты мен жертөлесінде орналасқан. Орталықта жаттығу залы, хорео­графия, шахмат, дойбы, тоғызқұмалақ, сурет, домбыра үйірмелері, сондай-ақ, қаладағы жастар ұйымдары мүшелерінің бас қосып, арнайы семинар-тренингтер өткізетін бөлмелері орналасқан. Ашылу салтанатына қатысқан облыс әкімі Бердібек Сапарбаев әрбір өскелең ұрпақ жеке қабіле­тіне және кәсіби біліміне сай қоғамымызда өз орнын табуы қажеттігін атап өтті. – Біздің әлеуметтік-экономи­калық даму жолындағы қарқы­нымыз, жастардың қоғамдық-саяси өмірдегі ұстанымына, олардың ер­теңгі күнге деген сенімі мен бел­сенділігіне тікелей байланыс­ты. Мемлекет басшысы Нұрсұлтан Назарбаев ел болашағының баянды болуы жолында жастарға ерекше сенім артып, жағдайын жасауға баса назар аударады. Елбасы­ның жыл сайынғы жолдау­ларында, маңызды стратегиялық құжаттарында басым бағыттарды жастармен байланыс­тыруы осы­ның айқын дәлелі, – деді өңір басшысы. Сонымен қатар, ағымдағы жылы Ақтөбедегі екі тұрғын үй кеше­нінде жастар орталығын ашу жоспарланып отыр. Атап айтқанда, «Нұр-Ақтөбедегі» клубқа беріліп отырған ғимаратты бейімдеп, жабдықтау үшін 34 миллион теңге көлемінде қаржы бөлінді. №11 шағын ауданындағы 2 қабатты ғимаратқа күрделі жөн­деу жұмыстарын жүргізу үшін 65 миллион теңге бағытталады. Осы жұмыстардың нәтижесінде облыс орталығында тағы да екі аула клубын ашу көзделуде. Сатыбалды СӘУІРБАЙ, «Егемен Қазақстан». Ақтөбе облысы.