Аудандық газеттің өз сайты бар

Бүгінгі күн биігінен қарағанда республикадағы аудандық газет­тердің жай-күйі әжептәуір түзеліп қалғанын көреміз. Тәуелсіздіктің алғашқы жылдарында, сол тұстағы өтпелі кезеңде ең алдымен еліміздегі аудандық газеттер қиын да күрделі жағдайға тап болғаны белгілі. Оқырманға ең жақын болып табылатын бұл басылымдардың шығу жиілігі бір айға дейін шегерілді. Ал кеңестік кезеңде аудандық газеттер аптасына үш рет шығып тұрған болатын. Бұған мысал ретінде еліміздің ең шалғай өңірлерінің бірі – Бөкей ордасы аудандық «Орда жұлдызы» газетін атауға болады. Таяуда осы газеттің шыға бастағанына 85 жыл толды. Осы датаға байланыс­ты газет редакторы Бауыржан Бисе­н­овтен шақыру алған кезде жердің шалғайлығына қарамастан оған арнайы барып, аудандық буындағы әріптестеріміздің қуанышына ор­тақтасқанды жөн көрдік. Мұнда ең алдымен байқаға­ны­мыз жердің шеті мен желдің өтінде орналасқан ауданда га­зеттің жай-күйінің жақсы дең­гейде екендігі. Редакцияға су жаңа автокөлік беріл­ген. Шығар­машылықпен жұмыс істеуге қажетті басқа да жағдайлар туғы­­зылыпты. Ең бастысы «Жайық Пресс» медиахолдингінің құра­мын­дағы «Орда жұлдызы» газе­тінің өз сайты ашылған. Мұның өзі аудандық газетте жарияланған материалдар төрткүл дүниеге таралады деген сөз. – Облыстағы аудандық га­зеттердің арасында Бөкей ордасы аудандық «Орда жұлдызы» газеті алғаш рет интернет желісіне қосылып отыр. Осы арқылы мұнда жарияланған материалдармен танысқысы келетіндерге кең жол ашылды. Өйткені, оның өз сайты бар. Бұл бүгінгі өмір талабы. Алдағы кезде өңірдегі барлық аудандық газеттердің сайттарын ашуды ойлас­тырып отырмыз, – деді бұл жөнінде газет тілшісіне «Жайық Пресс» ЖШС-нің бас директоры Жан­тас Сафуллин. Темір ҚҰСАЙЫН, «Егемен Қазақстан». Батыс Қазақстан облысы, Бөкей ордасы ауданы.