Ашылу салтанатының ресми бөлімінде Халықаралық Олимпиада комитетінің (ХОК) президенті Кирсти Ковентридің құттықтау сөзінен кейін Италия президенті Серджо Маттарелла 2026 жылғы Олимпия ойындарын ашық деп жариялады.
Дүбірлі доданың алауын тұтандыру бақыты Италияның даңқты тау шаңғышыларына бұйырды. Үш дүркін Олимпиада чемпионы, екі дүркін күміс жүлдегері, екі дүркін әлем чемпионы Альберто Томба Миландағы Әлем Араксында, Олимпия ойындарында үш мәрте мерейі үстем болған Дебора Компаньони Кортина-д’Ампеццодағы Анджело Дибона алаңында осы тарихи миссияны жүзеге асырды. Төртжылдықтың басты додасының жеңімпазы София Годжа да дәл сондай құрметке бөленді.
Олимпиаданың алғашқы күндері спорттың бірнеше түрінен бәсекелер өтіп, алғашқы жүлде жиынтықтары сарапқа салынды. Еліміздің өрендері жарысты сенбі күні бастады. «Тезерода» өткен шаңғышылардың скетлон сайысында Ксения Шалыгина – 53, Надежда Степашкина 60-орынды қанағат тұтты. Бас жүлдені швециялық Фридо Карлсон олжаласа, оның отандасы Эбба Андерсон күміспен күптелді. Қола медаль норвегиялық Хейди Венге бұйырды.
Көп кешікпей конькишілер бой көрсетті. 3 мың метрлік бәсекеде италиялық Франческа Лоллобриджида Олимпиаданың рекордын жаңартып, алтыннан алқа тақты. Норвегиялық Рагне Вилклунд пен канадалық Валери Малтиас күміс пен қоланы қоржындарына салды. Біздің Надежда Морозова алтыншы сатыға табан тіресе, Елизавета Голубева үздік ондықты түйіндеді. Осы орайда алғашқы алтылыққа енген спортшыларға мемлекет тарапынан берілетін сыйақының барын естеріңізге сала кетейік. Оның құны – 5 мың доллар (2,47 млн теңге). Ал жеңіс тұғырына көтерілген дүлдүлдер мынадай көлемде сыйақы алады: алтын – 250 мың доллар (123,3 млн теңге), күміс – 150 мың доллар (74 млн теңге), қола – 75 мың доллар (37 млн тенге). Төртінші, бесінші сатыға жайғасқандар 30 мың (14,8 млн теңге) мен 10 000 долларға (4,9 млн теңге) иелік етеді.
Жексенбідегі тау шаңғышыларының жарысында Әмірғали Мұратбеков – 45, Наиль Башмаков – 49-сатыға табан тіреді. Бұл жарыста алғашқы үш орынды Йоханнес Клебо (Норвегия), Матис Делож (Франция), Мартин Ньенгет (Норвегия) иеленді.
Теңіз деңгейінен 1 600 метр биіктікте орналасқан «Антгольц» стадионында биатлоншылар сайысқа түсті. Аралас эстафетада Владислав Киреев, Әсет Дүйсенов, Айша Рақышева, Милана Генева бақ сынап, 21-орынды қанағат тұтты.
