Орталық COVID-19 пандемиясы кезінде туындаған сын-қатерлерді ескере отырып салынды. Оның басты мақсаты – денсаулық сақтау жүйесінің төтенше жағдайларға дайындық деңгейін арттыру, ғылыми әлеуетті дамыту, заманауи цифрлық шешімдерді енгізу және білікті кадрлар даярлау. 350 төсектік орынға есептелген жаңа медициналық мекеме жыл сайын еліміздің түкпір-түкпірінен туберкулезге шалдыққан 2,5 мың науқасқа емдеу-диагностикалық қызмет көрсетуге мүмкіндік береді.
«Бұл орталық Президент тапсырмасымен ұлт денсаулығын нығайту және биологиялық қауіпсіздікті қамтамасыз ету мақсатында бой көтерді. Бүгінде мұнда ғылыми зерттеулер, озық технология, болашақ мамандарды тәрбиелеу бағыттары өзара сабақтасып, біртұтас жүйеге айналып отыр. Инфекциялық аурулардың ұлттық ғылыми орталығы өскелең ұрпақтың денсаулығын сақтауға, ұлттық қауіпсіздікті нығайтуға, отандық медициналық ғылымды дамытуға зор үлес қосады деп сенемін», деді Аида Балаева.
Премьер-министрдің орынбасары Мемлекет басшысының тапсырмасына сәйкес елімізде денсаулық сақтау нысандарымен қатар әлеуметтік инфрақұрылым да қарқынды дамып жатқанын атап өтті.
«Кейінгі екі жылда елімізде 695 жаңа медициналық нысан, 614 мың орынға арналған 419 жаңа мектеп салынды. Бұл 19 апатты мектепті жоюға, 58 мектептегі үш ауысымды оқыту мәселесін шешуге, 190 мектептегі оқушы орындарының тапшылығын азайтуға мүмкіндік берді. Сонымен қатар 237 спорт нысаны пайдалануға берілді, оның ішінде 69-ы қалаларда, 168-і ауылдық жерлерде орналасқан. 2025 жылы 61 мәдениет нысанының құрылысы аяқталды. Өңірлерде 251 нысанда жөндеу жұмысы жүргізіліп жатыр. Бұл өзгерістер, ең алдымен, халықтың өмір сапасын арттыруға, әлеуметтік қорғауды нығайтуға бағытталған», деп атап өтті А.Балаева.
Іс-шара барысында жиналғандар орталық бөлімшелерін аралап көріп, мекеменің инфрақұрылымымен, жабдықталуымен танысты. Сонымен қатар мекеме ұжымымен де кездесу өтті.
Айта кетейік, Инфекциялық аурулардың ұлттық ғылыми орталығы қысқа мерзімде салынған. Мұнда клиникалық көмек көрсету, ғылыми жұмыс жүргізу, білім беру, цифрлық технологияларды пайдалану секілді мүмкіндіктер бар. Орталық балалар мен жүкті әйелдерге де медициналық көмек көрсетеді. Төтенше жағдайлар кезінде жедел түрде 500 төсектік орынға дейін кеңейтілуі мүмкін.
ИАҰҒО – диагностика мен емдеуді ғана емес, инфекциялық және паразиттік аурулар, соның ішінде дәріге төзімді туберкулез түрлері бойынша күрделі зертханалық зерттеулер жүргізуге қабілетті толыққанды медициналық мекеме. Орталық ұлттық деңгейдегі инфекциялық қауіп-қатерлерге жүйелі түрде жауап беретін, сондай-ақ ғылыми жаңалықтарды дамытып, инфекциялық аурулар саласында мамандарды кәсіби даярлайтын жетекші базаға айналуды көздейді.
АЛМАТЫ
