Мессенджерді әзірлеушілердің айтуынша, Ресей билігі WhatsApp қызметін шектеуге кіріскен.
«WhatsApp-қа қолжетімділікті шектеу арқылы Ресей үкіметі 100 миллионнан астам адамды жеке сөйлесу құқығынан айыруға тырысуда. Бұл қадам мереке қарсаңында жасалып отыр», деді компания өкілі халықаралық Reuters агенттігіне 23 желтоқсанда.
Оның айтуынша, қосымша Ресейдің әрбір аймағында адамдардың күнделікті өміріне терең енген: ата-аналар чатынан бастап, жұмыс топтарына, достармен, көршілермен және туыстармен байланысқа дейін.
«Біз қолданушыларымызды қорғауға міндеттіміз. Себебі адамдарды мемлекет ұсынған, қауіпсіздігі төмен қосымшаларды пайдалануға мәжбүрлеу олардың жеке қауіпсіздігін әлсіретеді», деп қосты өкіл.
Ресейде WhatsApp жұмысы тамыз айынан бері жүйелі түрде бұғатталып келеді. Сол кезде-ақ көптеген қолданушылар үшін қоңырау шалу мүмкіндігі жабылған еді.
28 қарашада Ресейдің байланыс саласын қадағалайтын орган – Роскомнадзор егер компания ресейлік заң талаптарын орындамаса, яғни құқық қорғау органдарымен ынтымақтаспаса, мессенджерді толық бұғаттайтынын ескертті.
22 желтоқсаннан бастап ресейлік қолданушылар қосымшада ақауларға шағымданды. РБК дереккөзіне сүйенсек, Роскомнадзор WhatsApp жұмысын 70–80% деңгейінде әдейі баяулатқан.
