Сурет: dknews.kz
Президент атап өткендей, «Заң және тәртіп» – мемлекетіміздің мызғымас тұғыры. Бұл қағиданы берік ұстану – ұлттық қауіпсіздікті нығайту мен ел ішінде тұрақтылықты сақтаудың басты алғышарты. Қоғамда құқықбұзушылыққа төзбеушілік мәдениетін қалыптастыру – барша мемлекеттік органның және әрбір азаматтың ортақ міндеті. Осы бағытта Ұлттық ұлан жауынгерлері күн сайын тәртіпті қамтамасыз ету, құқықбұзушылықтың алдын алу, азаматтардың тыныштығы мен қауіпсіздігін қорғау ісінде табанды қызмет атқарып келеді. Президенттің бұл саладағы бастамаларын толық қолдаймыз және оны жүзеге асыруға бар күшімізді саламыз.
Жолдаудағы қоғамдық орындардағы дөрекілік пен тәртіпсіздікке қарсы тұру қажеттігі жөніндегі ой да өте орынды. Өркениетті қоғамның негізі – мәдениет пен әдеп. Әскери қызметші үшін де сыпайылық пен тәртіпті сақтау – басты қасиеттердің бірі. Сондықтан Ұлттық ұлан әскерилері қоғамдық тыныштықты күзетумен қатар, қоғамда сыйластық пен құрмет мәдениетінің орнығуына үлес қоса береді.
Мемлекет басшысы ел бірлігін нығайтуға ерекше тоқталды. «Әрбір азамат мемлекетшіл, отаншыл болуы керек», деген сөзі кәсіби парызымызбен толық үндеседі. Ұлттық ұлан сарбаздары үшін Отанға адал қызмет ету, егемендікті қорғау, жер тұтастығын сақтау – қасиетті борыш. Халқымыз татулықты сақтап, бірлігін арттырған жағдайда ғана кез келген қиындықты еңсеріп, алға нық қадам жасай аламыз.
Президент жастардың жаңа ұрпағына үлкен сенім артып отыр. Жолдауда айтылғандай, қазіргі жас буын үшін патриотизмнің басты көрінісі – жасампаздық пен жаңашылдық. Бұл – уақыт талабына сай құбылыс. Жастар ғылым-білімге ұмтылып, заманауи технологияларды меңгеріп, жасанды интеллектіні игеру арқылы елімізді өркениетті елдер қатарына қосуға талпынып жатыр. Ұлттық ұлан қатарындағы жас сарбаздар да осы ұмтылысты өз бойына сіңіріп, ел дамуына өз үлесін қосуға дайын.
Мемлекет басшысы сілтеме жасаған хакім Абайдың «Адамның адамшылығы ақыл, ғылым, жақсы ата, жақсы ана, жақсы құрбы, жақсы ұстаздан болады» деген сөзі әрбір азамат үшін өмірлік ұстаным деп білеміз. Ол бұл ойды жалғастырып, өркениетті елдің басты ерекшелігі – әділ заң, білікті билік, саналы әрі белсенді азамат екенін атап көрсетті. Бұл қағидаттар – құқықтық тәртіп әскери қызметінің де негізі. Әрбір әскери қызметші әділдікке, тәртіпке, елге адалдықпен қызмет етуге ант берген.
Жолдауда көтерілген тағы бір маңызды мәселе – мемлекет деңгейінде қабылданған шешімдер халықтың тұрмысын жақсартуға, экономиканы тұрақтандыруға, әлеуметтік әділеттілікті орнықтыруға бағытталуға тиіс екені. Бұл – елдің жаңа тұрпатты, қуатты мемлекетке айналуының басты жолы. Ұлттық ұлан өз кезегінде ішкі тұрақтылықты нығайтуға және қоғамдық қауіпсіздікті қамтамасыз етуге үлес қосып, осы үлкен мақсатқа қызмет етеді.
Еліміз бүгінде жан-жақты, түбегейлі реформалардың арқасында дамудың жаңа кезеңіне қадам басты. Алда ауқымды міндет тұр. Бағдарымыздан айнымай, алға қарай нық қадам бассақ қана мықты мемлекет боламыз. Президенттің стратегиялық бастамаларын жүзеге асыруда Ұлттық ұлан әскери қызметшілері әрқашан алдыңғы сапта болып, халық пен мемлекетке адал қызмет етеді.
Талапкер ӘМІРЕЕВ,
генерал-майор,
Қазақстан Республикасы Ұлттық ұлан «Оңтүстік» өңірлік қолбасшылығының қолбасшысы
