Фото: baq.kz
Асхат Қанатұлының айтуынша, әр саланың маманы әлеуметтік желіде блог жүргізуіне ешқандай шектеу қойылмаған. Десе де депутат мұғалімдердің жұмысы балалармен тығыз байланысты болғандықтан видеода олардың бет-бейнесі айқын көрсету қауіпті екенін атап өтті.
«Мұғалім әр тәрбие сағатын рилсқа жүктегенін қолдамаймын. Біріншіден, баланың бет-бейнесін рұқсатсыз қолдану, құқын елемеу. Егер мұғалім балалардың қатысуымен блог жүргізетін болса ата-анадан рұқсат алу керек. Екінші, ЖИ заманында оқушының бейнесін түрлі жағдайда пайдаланылуы мүмкін. Үшінші видео түсіру оқу процесіне зиян келтірмеуі тиіс», деді Асхат Аймағамбетов.
Тик ток, инстаграмдағы парақшаларын өзі жүргізетінін айтқан Аймағамбетов бұл шаруа біршама уақытты талап ететінін, сондықтан оқу-процесіне қатысты қандай да бір есепті желіге жүктеу талап етілсе оған қосымша ақы төлеуді де қаперге алу керектігін айтты.
«Мұғалімдерден қосымша мұндай белсенділікті талап ету дұрыс емес. Ал егер педагогтің өзі ынта танытса, баланың құқығы, ата-ананың рұқсаты, қосымша жүктемені алып жүру мен этикалық стандарттарды аттамауы шарт», деді депутат.
