Ұйымдастырушылардың пікірінше, қала мектептерінің оқушыларға, ата-аналарға, ұстаздарға тартымдылығын арттыруда бұл жобаның маңызы жоғары. «Мектепке арналған мектеп» жобасына қаладағы №47, №20, №40 жалпы білім мектептері мен О. Жандосов атындағы №105 гимназия қатысады.
«Қазір ғаламдағы өзгерістер адамзаттан асқан жылдамдықты талап етіп жатыр. Бұл білім саласының жаңаруына, заманауи технологияларды жылдам меңгеруді меңзейді. Осы орайда тартымды мектептер қатарын көбейту уақыт талабынан туындап отыр. Тартымды мектептер инфрақұрылымымен ғана емес, білікті педагогтер, жаңа заманға лайық мамандар, болашақтың мамандарын тәрбиелеуге бағдарланған әдістемелік кешенімен ерекшеленеді. Бүгінгі қалыптасқан жағдайда тартымды мектептерге сұраныстың жоғары екеніне көз жеткізіп отырмыз. Тартымды мектеп – өз бетінше дара болып табылатын, яғни оқушылар оқуға асығатын, ата-аналар баласын орналастыруға ұмтылатын, ал ұстаздар жұмыс істеуге құштар білім ордасы. Ондай мектептерде педагогтер жұмысын тастап кетпейді, оқушылар зор құлшыныспен білім алады, ата-аналар білім ошағын қолдауға әрдайым дайын тұрады. Мұндай мектептерде әр балаға жекелеген әдістемелік бағдар қарастырылған. Бүгінде балалар қауіпсіздігі басты назарда тұрған кезеңде тартымды мектептер қатарын көбейту арқылы білім саласындағы олқылықтарды жоюға болады. Балаларға сапалы білім беру, қауіпсіздігін қамтамасыз ету мектеп пен ата-ананың жауапкершілігінде. Олай болса, тартымды мектептер қатарын көбейту арқылы балалардың жарқын болашағын қамтамасыз етуге баршамыз атсалысуға міндеттіміз», дейді Алматы қаласы әкімінің жанындағы Әйелдер істері және отбасылық-демографиялық саясат жөніндегі комиссия мүшесі, «EDU Stream» халықаралық тіл академиясының бас директоры Наталья Мұхамеджанова.
Білім саласындағы теңсіздікті жоюды мақсат етіп отырған әлеуметтік жоба таңдалған мектептердегі білім көрсеткішін арттыруға қолдау көрсетіп, тәлімгерлік арқылы қоғамдық бастамаларды жұмылдыра отырып, әлеуетін көтеруге күш салады. «Мектепке арналған мектеп» қанатқақты жобасы бір жыл көлемінде «1 мектеп-ментор + 3 мектеп-менти» форматында тікелей жұмыс істейді. Ментор қызметі О.Жандосов атындағы №105 гимназияға жүктелген. Гимназия мектеп-ментилердің басқарушы персонал жүйесін реттеу мен даму стратегиясын қалыптастыруға, біліктілігін көтеруге ықпал ететін болады. №105 гимназия директорының ғылыми-әдістемелік жұмыстар жөніндегі орынбасары Эльмира Молотованың айтуынша, бүгінде түлектері еліміздің және шетелдің оқу орындарына түсуде жоғары нәтижеге қол жеткізіп отырғандықтан, мектеп мұғалімдері ЮНЕСКО және IB жобаларында мол тәжірибесімен бөлісуге дайын.
Жоба аясында тегін менторлық жұмыс кезең бойынша төрт бағытта жүзеге асатын болады. Онда әкімшілік-басқарушы персоналмен, педагогтер құрамымен, оқушылармен, ата-анамен жұмыс жоспарланған. Жоба бастамашылары мәселені жан-жақты қарастыру арқылы осы үрдіске қатысы бар тараптарды қамти отырып, оң нәтижеге қол жеткізуге болады деген сенімде.
Жобаға іріктелген мектеп-ментилер – жоғары көрсеткішті мақсат ететін білім алушыларға сапалы әрі нәтижелі білім беруді көздейді. Сәйкесінше, «3 мектеп-менти» – № 47, № 20, №40 жалпы білім мектептері қаланың әртүрлі ауданынан таңдалған. Көрсеткіші орташа болғанымен, болашақта бір мақсатқа қол жеткізуді көздейді.
Жоба аясында жасөспірімдерге кәсіп таңдауға және ата-аналарға болашақта кәсіби тұрғыда өсуге қолдау көрсетіледі. Жасөспірім баласы бар ата-аналарға «ата-ананың рөлі қай жерде аяқталып, қай жерде ұстаздың жауапкершілігі басталатынын» коучинг арқылы түрлі көмек құралдарын ұсынатын болады. Сонымен қатар педагогтер құрамына оқытуды ұйымдастыру, әдістемелік оқулықтар жиынтығын ұсыну, білім беру әдісін түзету, ассессмент, таланттарды басқару жағынан әдістемелік көмек көрсету және басқару жүйесіне қатысты кеңес беру көзделген.
АЛМАТЫ
