Мерейтойлық форумға АҚШ, Еуропа, Азия, ТМД елдері, Таяу Шығыстағы жетекші нейрохирургтерді қоса алғанда, 20 елден 400-ден астам делегат қатысты. Екі күнге ұласқан конгресс нейрохирургия саласындағы танымал көшбасшы, Уолтер Денди қауымдастығының негізін қалаушы, халықаралық клиникалық стандарттарға айналған көптеген ғылыми жұмыстардың авторы, қауымдастықтың жаһандық президенті, профессор Салим Абдулрауфтың жетекшілігімен өтті. Келелі кеңес барысында мидың қилы қатпарындағы кеселдерді заманауи технологияның игілігімен сылып тастап жүрген айтулы мамандар тәжірибелерімен бөлісті.
Walter E. Dandy қауымдастығы 2011 жылы АҚШ-та заманауи нейрохирургияның негізін қалаушылардың бірі – доктор Уолтер Эдвард Дендидің құрметіне құрылды. Ұйым құрылған сәттен бастап бүкіл әлемде озық тәжірибені насихаттауға, ғылыми біліммен алмасуға, нейрохирургиялық көмек деңгейін арттыруға бағыт ұстады.
Іс-шараның екі күндік бағдарламасында 40-тан астам ғылыми баяндамалар, дөңгелек үстелдер, пікірталастар мен шеберлік сағаты ұйымдастырылды. Ең өзекті мәселелер талқыланып, инновациялық нейрохирургиялық тәсілдер, нейрохирургияда жоғары технологияларды қолдану, күрделі онкологиялық патологияларды емдеу, сондай-ақ функционалдық, балалар нейрохирургиясындағы жаңа бағыттар төңірегінде тың идеялар айтылды.
«Астанада конгресс өткізу – әлемдік аренада еліміздің нейрохирургия саласының мойындалуы. Жыл сайын біздің Орталықта 5 мыңнан астам операция жасалады. Орталық сонымен қатар ғылыми қызметпен белсенді айналысады. Қазіргі уақытта Ұлттық нейрохирургия орталығы әзірлеген әдісті: омыртқа денелерін ауыстыруға арналған дербестендірілген 3D технологиялық импланттарын коммерцияландыру жөніндегі жұмыстар қолға алынды. Бұл әдістің практикалық қызметке интеграциясы әдістің енгізу ауқымының ұлғаюы мен масштабтау келешегіне жол ашады. Сондай-ақ орталық Азиядағы жалғыз радиохирургиялық кешен – «Гамма-пышақ» аппараты жұмыс істейді. Бүгінде оның көмегімен 2 000-нан астам пациент емделді. Орталық Азия елдерінде «Гамма-пышақ» аппаратын пайдалану ауқымын кеңейту мақсатында үкіметаралық келісім жүргізіліп жатыр», деп атап өтті «Ұлттық нейрохирургия орталығы» АҚ Басқарма төрағасы, Уолтер Денди атындағы нейрохирургиялық қауымдастығының X Дүниежүзілік конгресінің Президенті, профессор Серік Ақшолақов.
Конгресте сөз алған Walter E.Dandy нейрохирургиялық қауымдастығы Дүниежүзілік конгресінің жаһандық президенті Салим Абдулрауф (АҚШ), Премьер-министрінің орынбасары Ермек Көшербаев, Денсаулық сақтау министрі Ақмарал Әлназарова, Президент жанындағы Ұлттық ғылым академиясының президенті Ақылбек Күрішбаев, Парламент Мәжілісі Әлеуметтік-мәдени даму комитетінің төрағасы Асхат Аймағамбетов отандық нейрохирургия саласындағы жетістіктерге тоқталды.
Конгресте әлемнің жетекші сарапшыларының 40-тан астам баяндамасы тыңдалып, пленарлық сессиялар мен шебер-кластарында жаңа әзірлемелер талқыланды. Конгресс отандық нейрохирургияның әлеуетін танытып, ғылыми, клиникалық ынтымақтастықты нығайтуға серпін береді. Тағы бір мақсат – медицинада инновациялық тәсілдердің енгізілуін жеделдетіп, отандық мамандардың біліктілігін арттыру, елімізді Орталық Азияның медициналық хабы ретінде ілгерілету.
«Ұлттық нейрохирургия орталығы» АҚ – нейрохирургиялық патология кезінде диагностикадан бастап, пациенттерді ерте оңалтуға дейінгі медициналық қызметтердің толық спектрін көрсететін еліміздегі жоғары мамандандырылған клиника. Орталық Гамма-пышақ, нейронавигациялық, роботтық жүйелер, резиденттерді даярлауға арналған жоғары дәлдіктегі симуляциялық тренажерлерді қоса алғанда, озық технологиялармен жабдықталған. Құрылған сәтінен бастап жоғары технологиялық нейрохирургияны енгізудің драйвері саналады, халықаралық жобаларға белсенді қатысады әрі жетекші шетелдік клиникалармен ынтымақтастық орнатқан. 17 жыл ішінде орталықта 70 мыңнан астам пациент емделді. Жыл сайын жүйке жүйесінің ең күрделі патологиясы бар пациенттерге 5 000-ға жуық операция жасалады. Елімізде алғаш рет нейрохирургияның түбегейлі жаңа бөлімдері – микронейрохирургия, эндоваскулярлық, эндоскопиялық, функционалдық нейрохирургия енгізілді. 80 жаңа медициналық технологияның арқасында елімізде жоғары технологиялық емдеу қолжетімді. Орталық ашылғанға дейін жоғары технологиялық медициналық көмекке мұқтаж пациенттердің 80%-да ел ішінде мұндай ем алу мүмкіндігі болмаған.
