Суреттерді түсірген – Ерлан ОМАР, «EQ»
«Өнімдер табиғи таспен салыстыруға келетін өте берік, вандализм мен тозуға төзімді, ылғалға, шіруге және биологиялық ыдырауға ұшырамайды. Сондай-ақ –60°C-тан +70°C-қа дейінгі температурада қасиеттерін сақтап, экологиялық таза әрі ұзақ мерзімге шыдамдылығымен ерекшеленеді. Кәсіпорын 30% өңделген полимер мен 70% құмды араластыру арқылы жыл сайын 100 тоннаға дейін пластикалық қалдықты қайта өңдейді. Бұл – қоршаған ортаға түсетін салмақты азайту мен елде тұрақты даму қағидаттарын ілгерілету ісіне қосылған елеулі үлес», деді зауыт директорының орынбасары Ғайнұр Тоқтаров.
Мұндай тәжірибе алыс-жақын шетелде де бар. Мысалы, Амстердамда пластик қалдықтарынан 3D орындықтары жасалады. Роттердамдық «The New Raw» студиясы Нидерланд астанасының тұрғындары үшін тұрмыстық пластик қалдықтарын сәнді қоғамдық жиһазға айналдыратын ерекше жобаны іске қосқан. Ал біздегі «Ecomaf» өнімдерді тапсырыс бойынша ғана жасайды. Ал тапсырыс деген әзірше жеткілікті көрінеді. Тұтынушылар қатарында құрылыс компаниялары мен қалалық әкімдік те бар.
«Қазір ресми түрде 10 адам, жалдамалы тағы 15 адам жұмыс істеп жүр. Тапсырыс көбейген шақта тағы қосымша жұмыс күшін алуға тура келеді. Негізгі мамандарды өзіміз осында үйретеміз. Сөйтіп, бір кәсіп иесі етіп шығарамыз. Орындық жинаушылар мен темір дәнекерлеушілер бар. Ал қажет шикізат осы Астанада жетіп артылады. Біле білгенге үлкен орындықтың салмағы 200–250 кило болады. Тым ауыр. Оны оңайшылықпен сындырып, бүлдіру мүмкін емес. Сонымен қатар ұрлауға, басқа жерге қозғап қоюға тым қолайсыз. Кіші орындықтардың салмағы 70–100 кило тартады», деді зауыт өкілі.
Кәсіпорындағы жұмысшы жалақысы 320 мың теңгеден басталып, еңбегі мен кәсібіне қарай жоғарылай береді. Материалды қыздырып балқытатын пештерді бақылайтын операторлар 3 ауысыммен жұмыс істейді. Олардың еңбекақысы – 350 мың теңге. Сондай-ақ қосымша жұмыс болса, артық сағатына тағы төленеді.
Зауытта қауіпсіздік шаралары мен қондырғылары жұмыс істеп тұрса да салафан және түрлі пластик балқытылып, күйдірілетіндіктен кеңсірік қапқан ыс пен жағымсыз иіс бас ауыртады. Әзірше жұмысшыларға денсаулыққа қатысты төлем және арнайы сусын берілмейді екен. Шебер-технолог Нұрбақыт Елеусізов «Денсаулыққа қатысты төлем келешекте болады деген үмітіміз жоқ емес. Ал арнайы жұмыс киімі жыл сайын беріліп тұрады», деді.
