Мәдениет және ақпарат министрлігінің мұрындық болуымен өткен іс-шараға облыс аудандарындағы медиа орталық жетекшілері, сан жылдар бойы салада тер төгіп келе жатқан тәжірибелі журналистер және журналистика мамандығында білім алып жатқан студенттер қатысты.
Іс-шарада алғаш сөз алған Мәдениет және ақпарат министрлігі БАҚ саласындағы мемлекеттік саясат департаментінің директоры Қайнар Ахетов журналистикадағы бүгінгі өзгерістер, медиасаясат пен мемлекеттік органдардағы ақпараттық байланысты нығайту, жаңа деңгейге көтеру туралы ұтымды ойын ортаға салды.
Кейіннен іс-шараға арнайы қатысқан спикерлер бірнеше тақырып бойынша баяндама жасап, ұсыныс-пікірлерімен бөлісті. Өңірлік коммуникациялар қызметінің басшысы Алмат Сәдуақастың айтуынша, БАҚ пен мемлекеттік органдар арасындағы байланысты жақсарту мақсатында үздіксіз жұмыс жүргізілуі керек.
«Дәл қазіргі кезеңде жылдамдық қажет. Сондықтан да жылдам әрі нақты, дәйекті мәлімет берудің маңызы зор. Қоғам қажеттілігін өтеуде БАҚ пен мемлекеттік құрылымдардың өзара үйлесімді жұмысы шешуші рөлге ие екені даусыз. Осы орайда өңірлік коммуникациялар қызметі БАҚ өкілдері мен мемлекеттік органдар арасындағы тиімді іс-қимыл, байланысты, ашықтықты қамтамасыз етіп отырғанын айта кеткен жөн. Баспасөз мәслихатын ұйымдастырудағы мақсат – есеп тыңдау емес, жарты жыл, бір жыл ішінде атқарылған жұмыстың сапасына мән беру. Журналист байланыса алмай жүрген басқарма, департамент басшыларын бетпе-бет жүздестіре алатын бірден-бір орын – өңірлік коммуникация қызметі алаңы. Өңірлік коммуникациялар қызметі халық тарапынан келіп түскен арыз-шағым, сауалдарға да дер кезінде кері байланыс орнатып, жауап беріп отырады. Бұл тұста аудандағы медиа орталық басшыларының, баспасөз хатшыларының ықпалы зор», дейді ол.
Басқосуда сөз алған қаламгер Бақытжан Маханұлы жалған ақпараттың қоғамға тигізер зияны мен медиасауаттылықтың маңызына тоқталды. Спикер журналистер мен оқырмандар арасында сын тұрғысынан ойлау дағдыларын қалыптастыру қажет екенін, ақпаратпен жұмыс істеудің жауапкершілігі артқанын атап өтті.
«Jambyl» телеарнасының директоры Гүлбаршын Құланбаева медиаконтентті визуализациялау әдістерімен бөлісіп, графика, инфографика мен бейнематериалдардың аудитория тартудағы маңызын нақты мысалдармен көрсетті. Сол секілді журналистің баяндау шеберлігі мен аудиториямен байланыс орнату тәсілдері айтылды. Спикер сендіру, эмоциялық әсер және тілдік стилдің рөліне ерекше мән берді.
Семинар барысында тек кәсіби дағдылар емес, журналистердің әлеуметтік мәселелері де қозғалды. Қатысушылар саладағы еңбекақының төмендігі мен маман тапшылығын ашық айтып, бұл мәселелердің БАҚ сапасына тікелей әсер ететінін жеткізді.
Жамбыл облысы
