Суретті түсірген – Ерлан ОМАР, «EQ»
«Бұл қадам мемлекеттік саясат аясында салықтық жеңілдікті 20%-ға қысқарту мақсатында қабылданған. Десе де мұның салдарына үңіле білуіміз керек. Ел экономикасы мұнайдан ғана тұрмайды. Металлургия саласы экономикада стратегиялық маңызға ие, ал металл сынықтарын жинау мен қайта өңдеу – оның ажырамас бөлігі. Металлургиялық кәсіпорындар шикізат ретінде қайталама металдарды пайдаланады, бұл өндірістік шығынды азайтып, табиғи ресурсқа түсетін жүктемені жеңілдетеді. Әлемдік тәжірибеге сүйенсек, 1 тонна болатты қайта өңдеу 1,5 тонна темір кенін және 0,5 тонна көмірді үнемдеуге мүмкіндік береді. Сондай-ақ металдарды қайта өңдеу экологиялық жүктемені азайтады, өйткені ол бастапқы кенді өндіру және өңдеуге кететін шығынды қысқартады», деді қауымдастық өз мәлімдемесінде.
Олардың айтуынша, қазір қара және түсті металдардың қалдығы мен сынығын қарапайым азаматтар жинайды. Олардың үлесі металл сынықтарын жинаудың жалпы көлемінің 80%-ын құрайды. Бірақ жаңа салықтық талаптар бұл азаматтардың табысынан айырылып, металл сынықтарын тапсыруға деген ынтасын кемітпек.
Бұл ретте қауымдастық металл сынықтарын жинаумен айналысатын жеке тұлғалар үшін салық жеңілдіктерін қайтару; металл сынықтарды қайта өңдейтін кәсіпорындарға салықтық демалыстар немесе субсидия беру; лицензиялау және бақылау жүйесін жетілдіру; металл сынықтарын жинаушыларға арналған тіркеу рәсімдерін жеңілдету; жаңа салықтық талаптардың экономика мен металл нарығына әсерін жан-жақты зерттеу сияқты ұсыныстар жолдайды.
«Үкіметтің бюджет тапшылығын қысқартуға тырысып жатқаны құптарлық шара, дегенмен қара және түсті металдардың қалдығын жинайтын азаматтар үшін жеңілдіктің жойылуы қиындық туғызайын деп тұр. Сондықтан салықтық өзгерістерді қайта қарап, балама шараларды қарастыру маңызды», дейді қауымдастық өкілдері.
Экономист Алпамыс Сегізбайұлының сөзінше, қауымдастықтың көтеріп отырған мәселесі өте өзекті. Сарапшы мәселені «Атамекен» ҰКП-мен бірлесіп шешуді ұсынады.
«Тиісті мекемелер мен Мәжіліске хат жолдамас бұрын мемлекеттік институттарға проблеманы шешу жолдарын ұсынып, талқылатып алғаны дұрыс болар еді. Институттар мәселені тереңірек зерделеп, уәждің орынды екенін көрсетіп береді. Меніңше, жалғыз қауымдастық емес, бірнеше қауымдастық бірлесе отырып хат жолдаса, министрлік пен Мәжіліс құлақ асар еді», деген ойын жеткізді сарапшы.
