Фотолар: Мәдениет және ақпарат министрлігі
Музей қызметкерлері көпшілікке есікті реставрациялау кезеңдері туралы әңгімеледі және есіктегі жазбалардың мағынасын да түсіндіріп өтті.
Екі жыл жүргізілген ғылыми-зерттеу нәтижесі бойынша XIV ғасырдан бері сақталып келген қасиетті есіктің өңі сыр бере бастағаны мағлұм болған. Сол себептен 2021 жылы есік қалпына келтіру лабораториясына реставрация-консервация жұмыстары үшін жіберілген екен.
«Бұл жоба барысында 3D-сканерлеу, рентгенография және нейтронды томография сияқты заманауи технологиялар қолданылды. 5 жыл бойғы қайта қалпына келтіру жұмыстарының нәтижесінде, есік ғасырлар бойы қордаланып қалған шаң-тозаңнан, зиянкестерден тазартылды. Бұл қасиетті есіктің әлі ұзақ сақталуына сеп болып, осы уақытқа дейінгі белгісіз жазуларды да оқуға мүмкіндік беріп отыр. Реставрациялаудан өткен қабірхана есігі Түркістанға қайтарылып, «Әзірет Сұлтан» Ұлттық тарихи-мәдени музей қорығында сирек жәдігерлер музейінің экспозициясына қойылды», деп хабарланды Мәдениет және ақпарат министрлігінің баспасөз қызметінен.
