Ол алғашқы әңгімелер жинағы «Ақбердің ауласынан» бастап қазақ әдебиетінің көрнекті өкілі бола білді. Оның қаламынан туған бірнеше роман мен повесть, әңгімелер қазақ оқырмандарының сүйікті шығармаларына айналды. Біз, Әкім ағаның соңынан ерген інілері, жазушының жазу стиліне тәнті болатынбыз. Пьеса, сценарий жазуды қаншама қазақ жазушылары осы кісіден үйренгені ақиқат.
Қазақтың тағы бір көрнекті жазушысы Қалихан Ысқақовпен бірлесіп қаншама киносценарийді дүниеге әкелді десеңізші. Ол кейінгі інілерге өлшеусіз қамқорлық жасап, мейірімді аға бола білді.
Ол басшылық қызметте де асып-саспайтын байсалдылығымен, кеңқолтық мейірімділігімен ерекшеленетін.
Оның Қазақстан Жазушылар одағы мен киногерлер одағына сіңірген еңбегі ұшан-теңіз. «Қазақфильм» киностудиясының қалыптасуына, өсіп-өркендеуіне сіңірген еңбегі бір төбе.
Қазақтың кемеңгер, біртуар ұлы Әкім Таразисіз қазақ әдебиетін көзге елестету мүмкін емес.
Жатқан жеріңіз жарық болсын, асыл аға!
Мереке ҚҰЛКЕНОВ,
Қазақстан Жазушылар одағының басқарма төрағасы
