Мемлекет басшысының Ұлттық құрылтайда «жаппай кітап оқитын ұлтқа айналуымыз керек» деген бастамасын негізге ала отырып, «Бір ел – бір кітап» республикалық акциясы аясында көрнекті ақын Жұмекен Нәжімеденовтің шығармалары жөнінде Орталық кітапханада әдеби дәріс өтті. Халықаралық «Алаш» әдеби сыйлығының лауреаты, жұмекентанушы Амангелді Кеңшілікұлы «Жұмекеннің жұмбағы» атты тақырыпта сөз өрбітіп, келелі ойдың көрігін қыздырды.
– Бір күні әкем Жұмекен Нәжімеденовті үйге ертіп алып келді. Сол шақта ақынды алғаш рет көрген едім. Өте сыпайы, аса көп сөйлемейтін кісі екен, өлеңдерін де оқып берді. Мұның бәрін өзімнің «Қоңыр күздегі кездесу» деген эссемде жазғанмын. Жалпы, Жұмекен шығармашылығы туралы айтқанда, көп іркіліп қала береміз. Оның себебі, ақынның тереңдігі, интеллектуалдық қуатының жоғарылығынан деп түсінемін. Мәселен, ақынның өлеңіне жазылған әндер үш-төртеу ғана болар. Ал көбі Жұмекен Нәжімеденовті Әнұранның авторы деп қана танып жатады. Бұл дұрыс емес, ақынның ғажайып өлеңдері өте көп, – деді сыншы Амангелді Кеңшілікұлы.
Лекцияда жұмбақ ақынның әлем әдебиетіндегі ұстаздары, аудармалары мен еңбекқорлығы хақында жан-жақты айтылды. Келген қонақтар көкейдегі сауалдарын қойып, тұшымды жауап алды. «Рух жыры» атты жинағын ала келген сыншы Амангелді Кеңшілікұлы, болашақта жыр жұлдызы туралы кітапты толықтырып шығару ойында бар екенін жеткізді.
