Әңгімелесу барысында Мәжіліс спикері Хан Чуньлинді Қазақстандағы дипломатиялық миссиясының басталуымен құттықтап, бұл екіжақты қарым-қатынастың қарқынды дамуы кезеңіне сәйкес келгенін атап өтті.
– Қытай – біздің ең жақын көршіміз. Екіжақты қарым-қатынасымыз жаңа «алтын отыз жылдықтың» кезеңіне еніп, мәңгілік жан-жақты стратегиялық әріптестік рухында нығайып келеді. Бұл – ең алдымен, елдеріміздің көшбасшыларының қажырлы еңбегінің нәтижесі. Президент Қасым-Жомарт Тоқаевпен Төраға Си Цзиньпиннің тұрақты жеке кездесулері Қазақстан-Қытай ынтымақтастығын жаңа деңгейге шығарды, – деді Е.Қошанов.
Мәжіліс спикері мемлекет басшылары қол жеткізген барлық уағдаластықты іске асыру үшін парламентаралық байланыстарды дамытуға дайын екенін айтты.
Ерлан Қошанов сондай-ақ дипломатты Мемлекет басшысының жетекшілігімен Қазақстанда жүзеге асырылып жатқан ауқымды экономикалық және саяси реформалар туралы хабардар етті. Мәселен, халықтың бейбіт атомды сенімді әрі экологиялық таза энергия көзі ретінде дамыту туралы шешімі жайлы айтып, бұл қадам алдағы уақытта ғылымның, техниканың және өндірістің өркендеуіне бастайтынына назар аударды. Сондай-ақ өндіріс саласын кеңейту, банк секторын нығайту және инвестиция тарту бойынша жоспарлар да сөз болды.
Өз кезегінде Хан Чуньлин Қазақстан мен Қытай көшбасшылары саясатының ортақ тұстары барын және халықаралық күн тәртібінен экономикалық дамуға дейінгі мәселелер бойынша ұқсас құндылықтарды қамтитынын атап өтті. Елші Қазақстан ҚХР үшін Орталық Азиядағы аса маңызды сауда және инвестициялық әріптес екеніне тоқталды. Ол сондай-ақ партияаралық байланысты нығайтуға мән берді.
Тараптар энергетика, жасанды интеллект, цифрлық экономика, білім беру және туризм сияқты бағыттардағы ынтымақтастықты тереңдету жайын да талқылады.
