Сурет: freepik.com
Ел аумағында бұрыннан бар, идентификациялық кодтар дерекқорына (ИКД) енгізілген телефондар ешқандай шектеусіз жұмысын жалғастырады. Бұл жаңашылдық тіркеу жүйесін одан әрі жақсартып, алаяқтыққа қарсы күресуге, тұтынушылардың құқығын қорғауға, мобильді құрылғыны пайдалану қауіпсіздігін арттыруға бағытталған.
Бүгінде елімізде, шамамен 3,7 миллион қайталанған IMEI-коды бар құрылғы тіркелген. Олардың заңсыз әкелінуі айтарлықтай экономикалық және әлеуметтік мәселе туындатады. Мұндай мобильді құрылғылар нарығы құрылғылардың заңды айналымын бақылауды қиындатып, телефон ұрлығының көбеюіне ықпал етеді. Бір жағынан, әділетсіз бәсекелестік туғызады. Осы мәселені шешу мақсатында жаңа ереже енгізіліп, мобильді құрылғылар нарығының ашық әрі қауіпсіз болуын қамтамасыз ету қарастырылған.
Жаңа ережеге сәйкес тіркеу кезінде арнайы жүйемен мынадай өлшемдерді тексереді: бірінші – құрылғы IMEI-кодының түпнұсқалығы, екінші – IMEI-кодтың GSMA халықаралық базасында ұрланған, бұғатталған немесе жоғалған құрылғылар тізімінде болмауы, үшінші – құрылғының елімізге заңды түрде әкелінгені.
Қайсар ҚҰСАЙЫН
