Департамент басшысы Әлия Аманжолованың айтуынша, бүгінде өңір тұрғындарына онлайн режімде құқықтық көмек көрсететін «E-ZanKomegi» бірыңғай құқықтық көмек ақпарат жүйесі қызмет көрсетеді. Аталған жүйеге 2 мыңға жуық заң кеңесшісі мен қорғаушы тіркелген. Мысалы, кейінгі екі жыл ішінде 7 мыңға жуық тұрғын осы порталға кіріп, білікті заң мамандарының көмегін алған. Сондай-ақ ақпараттық жүйе арқылы 88 738 іс қаралған.
Таяуда құқықтық ақпарат қызметі операторлары «Бейнеқоңырау» қызметін іске қосты. Бұл азаматтарға тәулік бойы құқықтық кеңес алуға мүмкіндік береді. Қазіргі таңда жасанды интеллект элементтері бар тағы бір құқықтық кеңес беретін чат-бот әзірленіп, «Zan Komegi» мобильді қосымшасында сынақтан өткізіліп жатыр.
«Жасанды интеллектіні енгізу мақсатында министрлік заң қызметтерін ұсынатын платформаларды әзірлеуге бағытталған IT ұйымдарынан жұмыс тобын құрды. Біз кепілдендірілген мемлекеттік заң көмегін «E-ZanKomegi» жүйесі арқылы ұсыну үшін 131 адвокатпен, 27 заң кеңесшісімен келісімшартқа отырдық. Былтыр департаментке республикалық бюджеттен 150 млн теңге бөлінген. Бұл қаржы цифрлық қызмет көрсетуді жетілдіруге жұмсалды. Нәтижесінде, 17 630 азаматқа 13 360 қылмыстық іс, 19 азаматтық іс, 206 әкімшілік ісі бойынша сапалы құқықтық көмек көрсетілді. Сонымен қатар 4 мыңнан аса адамға құқықтық кеңес берілді», дейді Ә.Аманжолова.
Өңірде «Цифрлық сот орындаушысы» жобасы да оңтайлы жүзеге асырылып жатыр. Бұған дейін ақылы қызмет көрсететін жеке сот орындаушыларына жүгініп келген азаматтар аталған тегін қызметтің көмегімен 4 ай ішінде 550 млн теңге үнемдеген. Әділет министрлігінің бастамасымен жеңілдетілген өндірістің жаңа институты аясында жұмыс істеп жатқан жобаның артықшылығы көп. Мысалы, бұрын несие қарызын уақтылы өтей алмағаны үшін жеке сот орындаушының қызметіне айыппұлдың сыртында қосымша 25% қаражат төлеуге міндетті болған. Азаматтар осы шығындардан және жеке сот орындаушыларға жүгінуден босатылып отыр.
«Мәселен, 20 АЕК-ке дейінгі сомадағы оңайлатылған өндіріс бойынша азаматтар еGov Mobile қосымшасы арқылы іс туралы егжей-тегжей ақпараты бар sms хабарламалар мен push-хабарламалар алатын болды. Халыққа ыңғайлы болу үшін қазір борышкердің есепшотын бұрынғыдай бұғаттап тастамайды. Берешекті онлайн төлеу қолжетімді. Осылайша, адами фактор толығымен алынып тасталды», дейді ол.
Өткен жылдың қорытындысы бойынша өңірде жоғарыдағыдай жеңілдетілген өндіріс тәртібімен көлемі 211 396 214 теңге қаржыға атқарушылық өндіріс қозғалған. Бұл облыс тұрғындарына 6,5 млн теңгеден аса қаражатын үнемдеуге мүмкіндік беріп отыр.
Бүгінде өңір тұрғындарының дені жылжымайтын мүлікті онлайн тіркеуді де үйреніп алды. Яғни құны 50 млн теңгеге дейінгі жылжымайтын мүлік иелері нотариуспен бейнеқоңырау арқылы байланысып, келісімшарт жасай береді. Шарт жасау барысында биометриялық сәйкестендіру және электрондық цифрлық қолтаңба пайдаланылады.
Қостанай облысы
