Қоғам • 06 Маусым, 2024

Тасқында туған Тасқынбек

624 рет
көрсетілді
2 мин
оқу үшін

Атырау облысында 7 сәуірден бері табиғи сипаттағы төтенше жағдай сақталып отыр. Содан бері 1846 сәбидің өмірге келгені тіркелген. Нәрестелердің арасында 961 ұл, 885 қыз бар.

Тасқында туған Тасқынбек

Коллажды жасаған – Зәуреш СМАҒҰЛ ,«EQ»

Өңір жұртшылығын әбігерге салған тасқын су сәбилердің есіміне әсер еткені байқалады. Азаматтық хал актілерді тір­кеу басқар­масының басшысы Алмагүл Төремұратованың айтуын­ша, Атырау қаласында тұ­ра­тын бір отбасы дүниеге келген тұңғыш ұлын Тасқын-би есімімен атауды жөн көріп отыр. Ал Индер ауданындағы сәбидің біріне Тасқынбек есімі қойылған. Бұл – отбасындағы сегізінші бала.

Бір қызығы, екі ұл да бір күн­де өмірге келген. Нәрестелердің туған күні – 29 сәуір.

Статистикалық мәліметке қа­ра­ғанда, кейінгі кезде Аты­рау қа­ла­сында ата-аналар ұлы­на Мұхам­мад есімін көп таң­дайтыны байқалып отыр. Жыл ба­сы­нан бері 32 сәбиге дәл осы есім қойылған. Ал 19 балаға Хам­­за, 15 ұлға Айсұлтан есі­мі­­мен туу туралы куәлік бері­ліп­­ті. Қыз­дардың арасында танымал­ды­лығы тұрғысынан Айша есімі алдыңғы орында тұр. Осы есім 33 бұрымдыға қойылған. Бұдан соң 31 Медина, 29 Асылым, 27 Сафия есімі тіркелген.

Ал Жылыой аудандық орта­лық ауруханасының директоры Асулан Абдрахмановтың дере­гі­не қарағанда, 5 сәуірден мамыр­ға дейін жүкті аналар 42 сәби­ді дүниеге әкелген. Оның 20-сы ұл, 22-сі қыз. Құлсарыны тасқын басқан кезде іңгәлаған егіз ұл – жас отбасының төртінші және бесін­ші баласы. Сәбилердің бойы – 52 см. Екеуінің салмағы бірдей емес. Біреуінің салмағы – 3500, екін­шісі – 3350 грамм.

Өмірге сәби әкелген ана­ның бірі – Құлсары қаласының тұр­ғы­ны Жұлдыз Жандосқызы ­6 сә­­­­уірге қараған түнде босан­ған. Бірақ бірнеше сағаттан ке­йін Маң­­ғыстау облысының Бей­неу ауда­нындағы ауруханаға эва­куа­ция­ланған.

«Түн ортасында ұлымды бо­сан­­­ған кезде Құлсары қала­сына тас­қын су кіріп, жұрт әбігерге түсіп жатқан еді. Бұл – тұңғыш сәбиім. Содан болар, ұлым үшін алаң­дадым», дейді Жұлдыз Жан­досқызы. Жас ананың айтуын­ша, ата-енесі немересіне Бекзат ­есі­мін берген. Алайда сәбидің бүр­кеншік есімі де бар.

«Біз оны Тасқынбай деп ерке­летеміз. Өйткені ол су тас­қыны кезінде өмірге келді. Туыс­тарымыз да осылай әзіл­дегенді ұнатады», дейді Жұлдыз Жандосқызы.

 

Атырау облысы