В.Путин Федералды жиналысқа арнаған Жолдауын Батысқа сес көрсетуден бастады. Ол Украинаға әскери контингент жіберсе, «Батыс елдері қайғылы жағдайға тап болады», деп қорқытты деді.
«Бір кездері өз контингенттерін еліміздің аумағына жіберген мемлекеттердің тағдыры есімізде. Бізде де қару бар, иә, олар бұл туралы біледі», деді Путин. Бұдан соң Ресей президенті Украинадағы қақтығыста қолданылып жатқан «Кинжал» және «Циркон» гиперсоникалық кешендерімен мақтанды. Сондай-ақ ол 2018 жылы жасаған жолдауында ұсынған басқа да қарулардың сынақтардан сәтті өткенін айтты. Бұған қоса Путин стратегиялық ядролық күштер де қолдануға толық дайын екенін мәлімдеді.
Жолдаудың жиырма минутын Батыспен қақтығыс тақырыбына арнаған Ресей басшысы, елдің әлеуметтік және экономикалық қолдауына баса назар аударды. Ол бес жаңа ұлттық жобаның іске қосылғанын айтты.
Жобаның алғашқысы «Отбасы» деп аталады. Бұл бойынша 2030 жылға дейін отбасылық ипотека уақыты ұзартылып, үшінші бала туылғаннан кейін ипотекалық несие өтеледі. Туу деңгейі төмен аймақтарға отбасын қолдау бағдарламасы аясында 75 миллиард рубль бөлінеді.
Екінші ұлттық жоба денсаулық сақтау саласын дамытуға бағытталған. Путин ұсынған іс-шаралардың қатарында әйелдер консультациялары желісін кеңейту және балалар емханалары мен ауруханаларын жаңғырту, диспансерлеуге салық шегерімі, шағын қалалар мен ауылдарда спорт объектілерін салу бар.
Үшінші ұлттық жоба «Ресей жастары» – мектеп, колледж директорларының кеңесшілері 5 мың рубль, ал шағын елді мекендердегі сынып жетекшілері мен мектеп кураторлары 10 мың рубль сыйақы алады. «Кадрлар» төртінші ұлттық жобасы түрлі саладағы мамандарды даярлауға бағытталған. Ал соңғы «Деректер экономикасы» жобасына кемінде 700 миллиард рубль бөлу жоспарланған. Путин «ақпараттық егемендік» және «жасанды интеллекті дамытудың ұлттық стратегиясы» туралы ұзақ сөйледі. Оның идеясына сәйкес 2030 жылға қарай ресейлік суперкомпьютерлердің жалпы қуаты 10 есе артуы керек. Ол кәсіпкерлерді Ресейдің IT индустриясына инвестиция салуға шақырды.
Сонымен қатар Ресей президенті Үкіметке салықтан құтылу үшін бизнесін «кішірейткен» шағын компанияларға рақымшылық жасауды тапсырды. Ол «мұндай компанияларға өткен кезеңдер үшін айыппұл, санкциялар салынбайды, салықтар қайта есептелмейді», деп уәде берді.
Сондай-ақ 2030 жылға қарай Путин ең төменгі жалақы мөлшерін 35 мың рубльге дейін арттыратынын айтты (қазір ол 19 мыңнан сәл асады). Ресей басшысының айтуынша, қазір Ресей халқының 9 пайыздан астамы (13,5 миллион адам) кедейлік деңгейінде, 2030 жылға қарай оны 7 пайызға дейін төмендету көзделген.
Қарап отырсақ, Владимир Путин өзінің жоспарларын 2030 жылға дейін жасақтаған. Биылғы президенттік сайлауда жеңіске жетсе, ол кезде оның бесінші президенттік мерзімі аяқталады. Путиннің айтуынша, 2030 жылға қарай Ресей роботтар саны бойынша алдыңғы 25 елдің қатарына кіруі, импорттың үлесі ІЖӨ-нің 17 пайызына дейін төмендеуі және мектептерді күрделі жөндеу мәселесі шешілуі керек. Ол соңғы мәселеге 400 миллиард рубль бөлуге уәде берді.
Өткен сенбі күні Мемлекет басшысы Қасым-Жомарт Тоқаев Ресей президенті Владимир Путинмен телефон арқылы сөйлесті. Кремльдің баспасөз қызметінің хабарлауынша Қасым-Жомарт Тоқаев Ресей президентінің Федералдық жиналысқа жолдауы мазмұнды, бағдарламалық сипатта болғанын ерекше атап өтті.
