Павлодарда 2,7 млрд теңгеге бассейн салынады

Павлодарда Усолка мөлтек ауданындағы 50 метрлік бассейннің құрылысына 2,7 млрд теңге жұмсау көзделіп отыр, деп хабарлайды pavlodarnews.kz. Бұл туралы қала әкімі Нұржан Әшімбетовтің тұрғындармен өткізген есептік кездесуінде аймақ басшысы Болат Бақауов мәлім етті. «Биыл көпшіліктің сұрауымен және депуттардың қолдауымен онкологиялық орталықтың құрылысы басталады. Аталмыш нысан республикалық бюджет есебінен бой көтереді. Сондай-ақ, Усолка мөлтек ауданында биіктігі 50 метр бассейн салынады. Оған ERG компаниясы 2 млрд 700 млн теңге қаржылай қолдау көрсетуге ниет білдіруде», - деді облыс әкімі. Сондай-ақ қала әкімінің есеп беру кездесуінде аулаларды абаттандыру жұмыстары бойынша сауалдар қойылды. «Бүгінгі таңда Павлодар қаласында 370 аула жөндеуді қажет етеді. Биылғы жылы 131 аула ретке келтіріледі. Бұл мақсатта бір миллиард теңге бөлінді. Үш жыл ішінде біз барлық аулаларда абаттандыру жұмыстарын жасаймыз. 2020 жылға қарай қалада барлық аулалар көріктендіріледі», - деп сендірді Болат Бақауов.