Инновациялық әлеует ауылға да жетті

«Қазпошта» АҚ-тың заман талаптарына сай пошта бөлімшесі аудан ор­та­лығы – Ертіс ауылында ашылды. Аудан орталығының тұрғындары зама­науи технологиямен жабдықталып, халыққа сапалы, тиімді қызмет көрсететін пошта бөлімшесінің ашылғанына қуанышты. Бұл – ауыл халқына да сапалы, тиімді қызмет көрсетудің заманауи өркениетті үлгісі жетті деген сөз. Бөлімше бірнеше залға бөлінген: пошталық және қаржылық қызметтер, әрбір адамға арналған орындар, корпоративтік клиенттерге қызмет көрсету орны, сәлемдемелер супермаркеті бар. Пошта бөлімшесінде зейнетақыдан басқа, атаулы әлеуметтік көмекті, жалақыны алуға, коммуналдық, салық және басқа төлем­дерді жүзеге асыруға, газет-журнал­дарға жазылуға болады. Ал ауыл тұрғыны өз атына келген сәлем­­де­месін алу үшін терминалдың экра­ны­на ұялы телефонның нөмірін жа­зып, қатары мен жәшіктің нөмірі белгіленген талонды алады. Талон арқылы сәлемдемесін тауып, жеке куәлігі арқылы кассаға келеді. Осы жүйе арқылы 2 минут ішінде сәлемдемесін ала алады. − Бұл пошта қызметіне енгізілген заманауи құрылғылар мен жаңа қызмет түрлерінің арқасында мүмкін болып отыр. Жаңашылдық ауылдарға да жетті. Еліміздің пошта қызметінде гибридтік электронды пошта, Postmarket.kz сауда алаңы, постамат терминалы, мобильдік қозғалмалы құрылғы сияқты өрке­ниетті жаңа жобалар қосылуда, − дейді «Қазпошта» АҚ облыстық филиалының басшысы Қайрат Бекенов. Сонымен бірге, аудандық пошта бөлім­шесіне ВАЗ-2329 автокөлігі берілді. Енді ауданнан шалғай орналасқан ауылдарға хат-хабар, газет-журналдар жылдам жеткізілетін болады. Фарида БЫҚАЙ, «Егемен Қазақстан» Павлодар облысы, Ертіс ауданы