Семей әуежайын жөндеуге қаржы бөлінбек

Семейдің әуежайын қайта жаңарта, жаңғырта жөндеу сонау Кеңес өкіметі тұсынан бері қолға алынбаған шаруа болғандықтан, ғимаратының әбден ескіріп, тозып кеткендігі жасырын емес. – Авиациялық қауіпсіздік бізде қа­лыпты деңгейде, жолаушылар бұл жағына сенімді болсын, – деді аэропорт директоры Нұртай Оспанов, – тек ғимаратымыз ғана тозып тұр. Бұл Қазақстандағы ең ескі әуежай болып саналады. 1982 жылдан бері жөндеу көрмегендіктен авиарейстердің қатары шектелген. Сондықтан да бүгінде Семейден ұшақпен Алматы, Астана, Мәскеу және Өскеменге ғана бара аласыз. Бірақ, жолай ұшып бара жатқан кез келген халықаралық бағыттағы ұшақ, осы жерге қонып жанар-жағармай толтыра алады. Семей қаласының әуежайы «В» кате­гориясына жатады. Оның ауданы 3 500 шаршы метр. Аэрожүйе жұмысын 136 адам атқарады. Бұл әуежай 1982 жылы іске қосылған. Әуежай 57 421 мың жолаушыға қызмет көрсете алады, оның ішінде 80 па­йызы ішкі әуе қатынасы десек, халықаралық байланыс үлесінде – 20 пайыз. Бүгінде түрлі көлік инфрақұрылымы басты назарда. Мұндай жерлерде қатаң бақылау жүргізу, жолаушы азаматтардың еркін жүріп-тұруына мейлінше жағдай жасау – Елбасы тапсырмасымен қолға алынған шаруалардың бірі. Әуежай күрделі жөндеуден өткен соң толыққанды жұмыс атқармақ. Оны қайта қалпына келтіруге арналған дайын жобалық-сметалық құжаттар бар. Жобалық құны шамамен 10,5 млрд теңге. Семей қаласына Үкімет басшысы бастаған арнайы топ жұмыс сапарымен тамыз айында келген кезде, әуежайды жөн­деуге қаражат 2017 жылдың рес­­публикалық бюджетінде нақты қа­растырылады деген еді.  Әлбетте, мә­селе неғұрлым жылдам шешілсе, әуе байланысы қызметі де жақсара түседі. Осыған орай жақында қуанышты хабар келді. Осы нысанның директоры  Нұртай Оспановтың хабарлауынша, күрделі жөндеу үшін  «Нұрлы жол» бағдарламасы бойынша қазынадан 10 млрд 400 млн теңге бөлінген. Биыл жыл соңына дейін 331 млн теңгесі игерілуі тиіс. Осыған орай  облыстық көлік басқармасы мердігерді анықтау үшін байқау жариялаған екен.  Жоба бойынша екі  жылдың ішінде әуежайдың ұшу-қону жолағынан бастап, барлық инженерлік инфрақұрылымы, аэровокзал ғимараты түгелдей қайта жөн­де­леді. Қазір мұнда жылына 70 мың жо­лаушыға қызмет көрсетіледі. Әуе­жай директорының айтуынша, ұшу-қо­­ну жолақтары екі жарым шақырым бол­са, күрделі жөндеуден кейін 3 ша­­қырымнан асатын болмақ. Ол кез кел­ген алып ұшақтарды қабылдауға мүмкіндік береді және халықаралық талаптар дең­гейіне сай болмақ. Десек те, қарапайым халық үшін тағы бір проблема – әуежайға жету мә­се­лесі. Семейдің әуежайы дегенде көз ал­дыңызға  Алматының, Өскемен, не Астананың әуежайын елестетіп жүр­ме­ңіздер. Әрине, халқының саны жа­ғы­нан Өскемен қаласынан көп бол­са да, Семей қаласының әуежайы қа­ңырап бос тұрады. Ғимараттың іші өлі тыныштық. Өйткені, жоғарыда әуежай директорының өзі айтқандай, қолдағы бар мүмкіншілікке орай әуе­жай жартылай ғана жұмыс істеп тұр. Осы­дан 30-35 жыл бұрынғыдай бірінен соң бірі қонған ірі-ірі ұшақтарды, құмырсқадай құжынаған халықты мұнан көрмейсіз. Әуежайға келетіндер міндетті түрде қаладан сыртқа шығу үшін такси жалдайды. Үш-төрт жыл бұрын Семей қаласынан әуежайға дейін №33 автобус қатынайтын, не себеп екендігі белгісіз, бұл бағыттан автобус алынып тасталыпты. Алдағы уақытта осы жол қатынасы мәселесі шешілгені де дұрыс болар еді. Раушан НҰҒМАНБЕКОВА, журналист СЕМЕЙ