Көпшілік көкейіндегі мәселелер

Облыстық қоғамдық кеңестің кезекті отырысында бүгінгі күні жұртшылық назарын аударып отырған жерге қатысты жайлар әңгіме арқауына айналды. Онда осы мәселеге байланысты айтылған ұсыныстар мен пікірлерді жинақтап, республикалық комиссия қарауына жіберу туралы ортақ шешім қабылданды. Аталған жиынға кеңес мүшелерімен қа­тар, жер­гілікті биліктің, қоғамдық бірлестіктердің, саяси пар­тия­лардың өкілдері қатысты. Қоғамдық кеңестің төр­ағасы Қуаныш Елубаев жер заңдылығындағы өзге­рістерге жұртшылықтың бей-жай қарамауына байланыс­ты халық арасында қызу талқылаулар жүріп жатқанын еске алып, мәселенің мәнісіне қатысты жиналғандардың өзіндік ой-тұжырымдарын ортаға салуды ұсынды. – Бізді алаңдататыны кей­біреулердің Қазақстанда жер шетелдіктерге сатылады деген жалған ақпарды таратып жіберуі. Мұның өзі бірқатар түсін­бестіктерге жол ашты. Соған байланысты түсіндіру жұмыстары жандандырылды. Елбасы Жер кодексінің жекелеген тармақтары бойынша белгілі бір мерзімге мораторий жариялады. Президенттің тапсырмасымен арнайы комиссия құрылып, жұмыс істеуде. Біздің мақсатымыз нақты іс-шаралармен жұртшылықты айқын хабардар ету болып табылады,– деді ол. Облыс әкімінің орынбасары Мұхтар Жұмағазиев жер реформасының негізгі тұстарына тереңірек тоқталып, облыс аумағында осы бағытта атқарылып жатқан шаралар туралы тарата әңгімеледі. Аталған мәселе бойынша жағдайды тұрақтандыру үшін жергілікті билік тарапынан қолға алынған жұмыстармен жете таныстырды. Жерді тиімді пайдалану мәселелерін алға тарта келіп, ауыл­дарда кооперация құру көптеген түйінді жайларды шешуге септігін тигізетінін жадыға салды. Облыстық мәслихаттың депутаты, «Айс» ЖШС директоры Марат Итеғұлов, философия ғылымдарының докторы, профессор Алтай Тай­жанов, облыстық ардагерлер кеңесінің төрағасы Кеңес Бірманов, облыстық жер қаты­настары басқармасының басшысы Қабай Сәрсенғалиев және басқалары өздерінің жерге қатысты ойларын ортаға салып, ұсыныс-пікірлерін білдірді. Сатыбалды СӘУІРБАЙ, «Егемен Қазақстан» Ақтөбе облысы