Осака қаласында Қазақстан Республикасының Жапониядағы елшілігінің бастамашылығымен және Қазақстан Республикасының Кансай өңіріндегі Құрметті консулдығымен, сондай-ақ Осака қаласының сауда-өнеркәсіп палатасының ынтымақтастығымен Қазақстанға арналған экономикалық форум болып өтті. Оған Жапонияның іскер топтарының, Сыртқы істер, Экономика, сауда және индустрия министрліктерінің, академиялық топтардың және БАҚ-тардың өкілдері қатысты. Сонымен қатар, аталған өңірдегі ірі, орта және шағын бизнестің 150-ден астам өкілі келді.
Шара барысында Қазақстанның Жапониядағы елшісі А.Камалдинов жапон бизнесмендерінің назарына Қазақстанның инвестициялық мүмкіндіктерін ұсынып, Индустриялық-инновациялық даму бағдарламалары және Қазақстанның дағдарыстан кейінгі кезеңнен соң алда тұрған міндеттері туралы әңгімеледі.
Шара аясында арнайы дайындалып, еліміздің экономикалық дамуына, инвестициялық ахуалына және туристік әлеуетіне арналған ақпараттық-имидждік материалдар ұсынылды.
Кансай Жапониядағы аса дамыған қаржы-экономикалық орталық және өнеркәсіптік өңір болып табылады, деп хабарлады ҚР СІМ-інің баспасөз қызметі.