“Нұрлы көштегі” ауызашар

Көкшетаудағы Науан хазірет атындағы орталық мешіт қала іргесіндегі “Нұрлы көш” ауылында тұратын оралман ағайындарға арнап ауызашар берді. Мемлекеттік бағдарлама шеңберінде, қысқа мерзімде бой көтерген жаңа елді мекенде Қытай, Иран, Моңғолия, Ресей, Өзбекстаннан оралған 170-тен астам отбасы қоныстанған. Ауызашарға жиналған қауым алдында Қазақстан мұсылмандары діни басқармасының өкілі, облыстың бас имамы Қанат Қыдырмин құттықтау сөз сөйлеп, Рамазан айының тағылымы жайында уағыз айтты. Орталық мешіттің наиб-имамы Нұрлан Әбенұлы оразаның парыз-міндеттері туралы ой қозғаса, Краснояр кенті мешітінің имамы Науан Мүтәлұлы шариғатымыздың ізгілікке, бауырмалдыққа бастар қағидаттарынан әңгіме өрбітті. Сондай-ақ, өңірге белгілі айтыскер ақын, дін жанашыры Арман Бердалин өзінің діни тақырыптағы өлеңдерін оқыды. Өзгелер тәлім алар ауызашардан кейін тарауих намазы оқылды. Бақберген АМАЛБЕК. Ақмола облысы.