Сенат төрағасы халықаралық жарыстың жоғары деңгейде өткенін айта келіп, бұл спортшылардың шеберлігінің және жеңіске деген ерік-жігерінің нәтижесі екенін атап өтті.
«Президент Қасым-Жомарт Тоқаев мүмкіндігі шектеулі азаматтарды қолдау және инклюзивті орта құру мәселесіне әрдайым баса мән беріп келеді. Елімізде «Astana World Boccia Challenger» сияқты ірі сайыстың алғаш рет өткізілуі осы бағытта атқарылып жатқан жұмыстың нақты нәтижесі екені анық. Бұл жарыс біздің параатлеттер үшін белгілі бір деңгейде сынақ болды. Соған қарамастан ұлттық құрамамыз лайықты деңгейде өнер көрсетіп, ел намысын абыроймен қорғап шықты. Осы орайда Итиана Шыңғысханова, Балжан Бөлекпаева, Эльмира Мусралиева, Ерхат Алмат және Азамат Аязбаев сияқты спортшылардың есімдерін ерекше атап өткен жөн. Халықаралық жарыстың жеңімпаздары мен жүлдегерлерін шын жүректен құттықтаймын. Біздің спортшылар алдағы Паралимпиада, Параазиада ойындарында, басқа да ірі додаларда да топ жарады деп сенемін. Осы мақсатқа жету үшін бәріміз бірлесіп, нәтижелі жұмыс істей береміз», деп М.Әшімбаев жүлдегерлерді марапаттады.
Сондай-ақ Федерация президенті «Astana 2025 World Boccia Challenger» турнирін жоғары деңгейде өткізуге атсалысқан барша белсенді азаматқа, параспортшыларға, олардың ата-аналарына, жаттықтырушылар мен төрешілерге және еріктілерге алғыс білдірді.
Жарыс қорытындысы бойынша Қазақстан құрамасы жекелей сында екі алтын, екі күміс және бір қола медальмен жалпы есепте үздік үштікті түйіндеді. Атап айтқанда, BC2 санатында Итиана Шыңғысханова жеңіске жетсе, ВС1 санатында Балжан Бөлекпаеваға тең келер қарсылас болмады. Ал Азамат Аязбаев (ВС4 санаты) пен Ерхат Алмат (ВС1 санаты) қоржынға күміс жүлде салса, Эльмира Мусралиева (ВС4 санаты) қола медальды еншіледі.
Командалық сайыста Корея және Иран елінен келген параспортшылар тиісінше бірінші және екінші орындарға табан тіреді.
Жұптық бәсекеде ВС4 санатында отандастарымыз Азамат Аязбаев пен Эльмира Мусралиева (Алматы қаласы) топ жарса, Иран елінің өкілдері екінші орыннан көрінді. ВС3 санатында Корея спортшылары үздік шықты. Екінші және үшінші орындар тиісінше Италия және Үндістан спортшыларына бұйырды.
Халықаралық бочча федерациясының (BISFed) қолдауымен ұйымдастырылған аталған сайыс елімізде алғаш рет өткізіліп отыр. Турнир барысында параспортшыларға 2028 жылы Лос-Анджелесте өтетін Паралимпиада ойындарына қатысу үшін берілетін рейтингтік ұпайлар сарапқа салынды.
