Кездесу орны - Оңтүстік

Қазақстан Бокс федерациясының кубо­гы жолындағы матчтық кездесулер одан әрі жалғасуда. Соның кезектісі сенбі күні Шым­кентте “Оңтүстік” дивизионына кіре­тін Оңтүстік Қазақстан мен Қызылорда облыстарының арасында өтті. Кубок жо­лын­дағы жекпе-жектер басталғаннан бері ал­ғаш рет ашық аспан астында өткен ай­қас­та алаң иелері 29:6 есебімен басып түсті. Осы күні командалар ара­­сында Шымқаланың Әл-Фараби ат­ындағы даңғылының алаң­қайына жиналған жұртшылық алдындағы кездесулер қызықты және тар­тысты өтті. Бұл жекпе-жектерде Оңтүстіктің командасы жеті рет жеңіске жетсе, Сыр бойының спортшылары қарсы­ластарын үш рет тізе бүктірді. Дегенмен, қызылордалықтар сапындағы Асқар Қонақбаев (81 кг.) пен 91 кг.-ден жоғары сал­мақтағы Ержан Жұмаділдаевтың шаршы алаңға уақытында шық­пауынан оларға жеңіліс беріл­генін атап өткен жөн. Осы үшін жеңіс олардың қарсыластары – Асқар Абдуллаев пен Досжан Оспановқа берілді. Ал басқа жекпе-жектерде боксшылардың бәрі шаршы алаң­ның шырайын келтіре ай­қасты десе болады. Мұнда ұзақ уақыт­тан бері ринг­ке қайта көтерілген Бейжің Олим­пиадасының қола жүлде­гері Еркебұлан Шынәлиев (91 кг.) қызылордалық Қамшыбек Қонақбаевпен айқасты. Еркебұ­лан былтырдан бері 10 кг. салмақ қосыпты. Осы салмақта да ол еркін қимылдап, жеңіске жете алатынын көрсетті. Есеп – 13:5. Бұл күні тағы бір қызықты айқас Рустам Сыбаев пен Юна­дий Точиевтің (ОҚО) арасында өтті. Өткен жолы Астанада төрт елдің құрамалары қатысқан ха­лықаралық турнирде Серік Сә­пиевке есе жіберіп алған Р.Сы­баев бұл жолы қарсыласын оң­дырмай ұтты. Ал басқа жекпе-жек­терге келер болсақ, 52 кг. сал­мақта қолғап түйістірген Нұрғазы Жүсіпов (ОҚО) пен Бекболат Жүсіповтің арасындағы бәсеке осы кезге дейін болған матчтық кездесулерде тіркел­меген ең ірі есеппен аяқталды. Есеп – 26:3. Бұдан кейін 56 кг. салмақтағы Алмат Ысқақов (Қызылорда обл.) пен Қайрат Ералиевтің арасын­дағы кездесу 6:2, Азамат Албасы­нов (ОҚО, 60 кг.) пен Асхат Жеңісбековтің жекпе-жегі 4:3, Алмасбек Әлі­беков (ОҚО, 64 кг.) пен Ғалым Өте­геновтің айқасы 8:1, Жас­қай­рат Ысмайылов (Қызылорда обл., 75 кг.) пен Қуат Қаратаев­тың арасындағы айқас 6:4 есе­бімен тәмамдалды. Келесі матчтық кездесу алда­ғы сенбі күні Қарағандыда жер­гі­лікті боксшылар мен Ақмола об­­лысының командасы арасында өтеді.

* * *

ШОҚТЫҒЫ БИІК БӨЛТЕКҰЛЫ ШАЙҚАСЫ

18-22 тамыз күндері Ақ­тауда ересектер арасында қазақ бок­сының атасы Шоқыр Бөл­тек­ұлын еске түсіруге арналған V халық­аралық турнир болып өтті. Турнирге Астана және Алма­ты қалаларының, Ақмола, Қара­ғанды, ШҚО, Алматы, Жамбыл, ОҚО, Атырау, Ақтөбе мен Маң­ғыстау облыстарының және Әзір­байжан, Сирия, Түркіменстан, Украина, Молдова, Қырғызстан, Ресей, Өзбекстан мен Қытай командалары қатысты. Төрт күнге созылған тартыс­ты айқастарда қазақ боксшылары ішінен Мардан Берікбаев (49 кг.), Әли Байбозов (52 кг.), Жандос Момынов (56 кг.), Берік Абдрах­манов (60 кг.), Ғайба­тол­ла Ғад­жи­а­лиев (64 кг.), Бақыт­жан Қо­жа­беков (69 кг.), Әділбек Ния­зым­бетов (75 кг.) жеңімпаз атан­са, 81 кг. салмақта қырғыз Шың­ғыс Борбашевтің, сириялық Госсун Мұхамедтің (91 кг.) және аса ауыр салмақтағы украин Ростислав Архипенконың мерейі үстем болды. Ал ұлттық құра­ма­да екінші орынды Азат Мах­ме­тов (52 кг.), Әлемжан Құдайбер­генов (56), Жандарбек Исанов (60 кг.), Қуаныш Төлегенов (64 кг.), Жомарт Бектаев (75 кг.), Данияр Үстембаев (91 кг.), аса ауыр сал­мақтағы Евгений Белов иеленсе, қола жүлдені Азамат Исақұлов (52 кг.), Мейірболат Тойытов, Асхат Таумұрынов (56 кг.), Айдар Әмірзақов, Думан Әлімов (60 кг.), Әділет Егізеков (64 кг.), Ма­нат Өмірзақов, Нұрсұлтан Мұс­тафин (69 кг.), Азамат Белгібаев (81 кг.), Ержан Қарабалаев (91 кг.) қанағат тұт­ты. Осы салмақ­тарда Қытайдың атынан сынға түскен екі қан­да­сымыз да үшінші орынды иелен­ді. Олар – Асыл­хан Ерзат (64 кг.) пен Әнуар Ершат (75 кг.). Тағы бір тегі түр­кілік Қытай спорт­шы­сы Маоло Тохтычонг 75 кг. сал­мақта қола жүлденің иесі атанды. Жалпы, турнирде қазақ бокс­шылары 6 алтын, 7 күміс және 10 қолаға қол жеткізді. Дастан КЕНЖАЛИН. * * * КҮТПЕГЕН ЕСЕП КӨП ЕМЕС Футболдан Қазақстан чем­пио­натының биылғы маусымы бел ортасынан асты. Жексенбі күні өткен 23 турдың ойында­рынан кейін Қостанайдың “То­был” клубы өз алаңында “Аты­рау” командасын 3:0 есебімен жеңіп, турнир кестесінде өкшесін басып келе жатқан “Ертіс” (Пав­лодар)            клубынан 7 ұпай айыр­ма­шы­­лы­ғымен ұзап, бірінші ор­ынға нық орнықты. Ал осы турда ойналған басқа матчтар мынадай есеппен аяқталды. “Ақ­төбе” – “Шахтер” 2:0, “Ертіс” – “Ло­комотив” 0:1, “Же­тісу” – “Оқ­жет­пес” 0:0, “Ор­д­абасы” – “Ақ­жай­ық” 1:2, “Қайрат” – “Тараз” 0:3. 23 турдан кейін “Тобыл” ко­ман­дасының ойыншысы Ұлық­бек Бакаев 12 доппен мергендер тізі­мін бастап келеді. Одан кей­ін­гі орындарда 10 доп соққан Нұр­бол Жұмасқалиев (“Тобыл”), 9 доп­тың авторлары Глеб Маль­цев (“Ер­тіс”), Геор­гий Даскалов (екеуі де “Ертіс”), Игорь Бугаев (“Ло­ко­мотив”) және 7 доп соққан Алек­сей Маль­цев, Саки Мозес (екеуі де “Ақ­жай­ық”), Валерий Андроник (“Ло­комотив”), Мұрат Тілешев пен Самат Смақов (екеуі де “Ақ­төбе”), Андрей Финон­чен­ко мен Алдин Джидич (“Шахтер”) тұр. Төменде осылардың ішінде тур­нир кестесінің көшбасшы ко­ман­дасының капитаны, ұлттық құ­рама шабуылшысының биыл­ғы чем­пионат туралы білдірген пікірі­мен таныстыруды жөн көріп отырмыз. * * * НЕ ЖОҚ БОЛУ, НЕ БАР БОЛУ! Нұрбол ЖҰМАСҚАЛИЕВ, Тобыл” футбол клубы­ның команда капитаны: Футболдан Қазақстан чем­пионаты ешқашан биылғыдай күшті, қызық, тар­тысты өткен емес. Қазір бірінші алтылыққа кіру үшін шиыршық атқан күрес жүріп жатыр. Мықты командалар алдына не бар болу, не жоқ болу керек деген мақсат қойған. Бар­лы­ғы үшін бір міндет – алты­лық­қа ену! Бұл біздің “Тобыл” командасына да тікелей қатысты. Осы чемпионатта “Тобыл” командасы көпшілік қарсылас­тарымыз үшін кедергі іспетті. Бұл “Тобылдың” мықтылығын білді­реді! Екіншіден, “бап шаба ма, бақ шаба ма?” дегендей, “То­был­ды” жеңу қай командаға болсын мақтаныш. Сол үшін кім де болса барын салады. Ал біз үшін осы чемпионатта және Қа­зақстан ку­бо­гінде жеңіс тұғы­ры­на көтерілу басты нысана болып отыр. Мық­ты қарсылас болмаса, өзіңді мық­ты командамын деп қайдан се­зінесің? Еңбексіз келген жеңістің дәмі де тәтті болмайды. Осы орайда біз “Ақ­төбе”, “Шахтер”, “Ертіс”, “Ло­ко­мотив” команда­ларының ой­ындарына ризамыз. Осы жігіт­тердің шеберліктері мен қайраққа жанығандай намысы чемпио­нат­та бізді де қамшы басуға итер­ме­леді, жанкүйерлерге де тамаша қанағат сезімін берді деп ой­лаймын. Биылғы чемпионат форма­тының өзгеруі бұл командалар үшін өте қолайлы болды, өз күшін сынауға толық мүмкіндік берді. Күшті деген командалар өзара төрт рет бақ сынасады. Ой­ыншылардың киімі, стадионның жарақталуы біздің елдің биік экономикалық деңгейінен де хабар бергендей. Мұның барлы­ғы да жақсы нышан. Дегенмен, жанкүйерлер ста­дионда аузы-мұрнынан шығып отырса, бәйгеге түскендердің де­лебесін қоздырып, чемпионат­тың да сәнін келтіре, бағасын арт­тыра түсер еді. Әттең, олай бол­май тұр. Біздің елде футбол­ды барын­ша насихаттау керек. Саламатты өмір салты тұрмы­сымыздың си­па­ты болу үшін оған алдымен қыз­мет ететін спорт екенін Пре­зидент Нұр­сұл­тан Назарбаев айтып келеді. Тағы бір айта кетер жәйт, ко­мандалардың құрамын талан­тына, қабілетіне, еңбегіне қарай емес, жасына қарай жасақтау осы чемпионатта да білініп тұр. Бұл кейбір командалардың жеңілістің ащы дәмін татуының себебі де болған шығар, бәлкім. Футболдың бұл мерекесі же­ңіспен де, жеңіліспен де есте қалатын болады.