Ауқымды шараға әзірлік жолында

Астанада өтетін Саммитке дейін 100 күн бұрын ЕҚЫҰ-ның Іс басындағы төрағасы мүше мемлекеттерді ортақ сынақтарға бірлесе жауап іздеуге шақырады. Кеше ЕҚЫҰ-ның Іс басындағы төрағасы, Қазақстанның Мемлекеттік хатшысы – Сыртқы істер министрі Қанат Саудабаев “56 мүше мемлекеттер көшбасшыларының Астанада 1-2 желтоқсан аралығында өтетін кездесуі бүгін біздің алдымызда тұрған сынақтар мен қауіптерге тиісті жауап қайтаруға тамаша мүмкіндік береді” деп мәлімдеді. “11 жылдық үзілістен кейін Қазақстан Президенті Нұрсұлтан Назарбаевтың бас­тамасымен алғаш рет ұйымдастыры­л­ғалы отырған Астана Саммиті біздің елдер мен олардың саяси көшбасшыларына, 21-ғасырда да өз өзектілігі мен қажеттілігін жоғалтпаған, ЕҚЫҰ негізге алған жал­пы­ға ортақ қауіпсіздік пен ынтымақтас­тық­ты қамтамасыз ету принциптерін әлемге паш еткізуге ерекше мүмкіндік. Саммитке дейін қалған 100 күн ішінде Астанада өтетін сонау тарихи кездесу жоғары маз­мұн­ды және ұйымдасқан деңгейде өту үшін және ЕҚЫҰ-ға мүше мемлекет­тер­дің көшбасшылары Ванкуверден Вла­ди­вос­токқа дейін “қауіпсіздік кеңістігі” тұ­жырымдамасынан “қауіпсіздік қоғам­дастығына”, біздің ортақ ұйымның ны­ғаюы мен жаңаруына жол ашу үшін үл­кен жұмыс атқаруымыз қажет”, деді Қ.Саудабаев. ЕҚЫҰ-ға мүше мемлекеттер басшы­лары­ның соңғы Саммиті 1999 жылы Ыстамбұлда өткен болатын. Осы жылы Ұйым­ның Саммитін өткізу туралы ше­шім Ұйым мемлекеттерінің сыртқы істер министрлерімен Алматы жанында өткен министрлердің бейресми кездесуінде қол жеткізілген келісім нәтижелері бойынша 3 тамыз күні қабылданды. Астана Сам­миті Ұйым тарихындағы жетінші Саммит болмақ. Осының алдындағы саммиттер 1975 жылы Хельсинкиде, 1990 жылы Па­рижде, 1992 жылы Хельсинкиде, 1994 жылы Будапеште, 1996 жылы Лиссабонда және 1999 жылы Ыстамбұлда өткен болатын. Саммиттің ізашары ретінде Варшава, Вена және Астанада өтетін үш бөліктен тұратын Шолу конференциясы болады. Аталған конференция 30 қыркүйектен басталды.