Ақтөбелік балуан – әлем чемпионы

Жақында Оңтүстік Кореяның Мен­гун қаласында өткен VI әлемдік әскери ойындардың грек-рим күресінен спорт шебері Мейрамбек Айнағұлов жеңімпаз атанып, олжалы оралды. Төрт жылда бір рет өткізілетін беделді жарысқа биыл 117 елден 7 мыңның үстінде спортшылар қатысыпты. Қорғаныс министрлігінің армияшылардың орталық спорт клу­бының қызметшісі Мейрамбек Айнағұлов барлық белдесулерін 10:0 есебімен ұтып, қарсыластарын таза жеңген. Ақтөбелік балуан алдымен жастар арасында әлем чемпионы әзербайжан К.Маммодовтың жауырынын жер иіскетсе, одан кейін 23 жасқа дейінгілер арасындағы Еуропа чемпионатының қола жүлдегері түрік Киразадан, Азия чемпионы, кілем ие­сі корей балуаны Чой Иннен басым түскен. Ал ақтық бәсекеде Африка ойындарының, Африка құрлығының чемпионы египеттік Х.Махмудті таза жеңді. Ол – отандық грек-рим күресі мектебінің тарихында мұндай жеңіске жеткен тұңғыш спортшы. Осылайша жас балуан халықаралық дәрежедегі спорт шебері нормативін орындады. Мейрамбектің жеке жаттықтырушылары Рахымжан Бақытжанов пен Қайыржан Бекенбаевтың бұл жолы да үкілі үміттері ақталды. – Бұл менің ғана емес, жаттық­ты­рушыларымның, мені қолдаған облыстық дене шынықтыру және спорт басқармасының, грек-рим кү­­ресі фе­дерациясының, «Ақ­пан» ком­паниясының, барша жанкүйерлерімнің жеңісі, – дейді Мейрамбек Айнағұлов. Ол Шалқар қаласында туып, өсіп, осындағы В.Цеханович атындағы №1 БЖСМ-да боз кілемнің дәмін татып, жаттығуын бастаған. Жас балуан кадеттер арасында 2011 жылы әлем чемпионы атанды. 2013 жылы ересектер арасындағы Қазақстан Кубогының иегері, өткен жылы ересектер арасында Қазақстан чемпионы, сондай-ақ ересектер арасында Қазақстанның IV жазғы спартакиадасының жеңімпазы болған небәрі 21 жастағы Мейрамбек Айнағұловтың спорттағы алар асуы алда, болашағы бұдан да үмітті. Сатыбалды СӘУІРБАЙ, «Егемен Қазақстан». Ақтөбе облысы.