Төлегеновтер отбасына қандай сыйлық та лайық

Төлегеновтер отбасын тек об­лыс жұртшылығы ғана емес, бүкіл еліміз та­нып қалды. Олар күзде «Мерейлі отбасы» бай­қауының облыстық са­тысынан жеңімпаз атанып, рес­пуб­ликалық байқауға да қатысты. Онда жеңімпаз атанбағанымен сегіз баланы қамқорлыққа алып, тәрбиелеп өсіріп отырған Нұрлан мен Гүлжауһар өз­де­рінің мейрімімен, еңбегімен талайды там­сандырып, алғысқа бөленіп қайтқан еді. Төлегеновтер отбасы елімізде бірінші болып отбасылық ба­ла­лар үйін құрғалы отыр. Жақында Нұрлан жүргізуші болып істейтін «KMF» шағын несие ұйымы бұл отбасына шағын автобус сыйға тартты. – Төлегеновтер Астанаға барып, республикалық байқауға қатысқанда біз бүкіл ұжым болып, оларға дауыс бердік. Әрине, олардың жеңісін тіледік. Әңгіме жеңуде ғана емес. Өзінің бір баласымен қоса сегіз баланы асырап алып, бақытты ету Төле­геновтер отбасының басты жеңісі екенін барлығы да мойындайды. Біз оларға он орындық шағын автобус­ты сыйға тартуды ойладық, мұны бизнестің әлеуметтік жау­ап­­­кершілігі деп түсінеміз, – деді «KMF» шағын несие ұйы­мы жұрт­шы­лықпен байланыс жө­ніндегі басқарма төрағасының кеңесшісі Рауза Ибрагимова. – Енді балалармен де­м­алуға бәріміз бірге шығатын болдық. Біз­­дің отбасы үлкен болғандықтан, та­биғат аясына шыққанда папасы бар­лығымызды бірнеше рет таситын, енді автобусқа барлығымыз да сыямыз! – дейді қуанған Гүл­жауһар. Берекелі отбасына сыйға тартқан көліктің құны 10 миллион теңге тұрады. Оның сыртында «KMF» ұйымының барлық облыстардағы 18 филиа­лының қызметкерлері 2 миллион 300 мың теңге қаржы жиып берді. Оны Нұрлан өздеріне арнап салынып жатқан үйге жаратпақ. – Бізде Нұрлан үш жыл жұмыс істейді. Оның жасап отырған сауапты ісі біздің ұйымшыл ұжымымыз үшін мақтаныш, үлгі аларлық азамат, – деді «KMF» шағын несие ұйымы Қостанай филиалының директоры Нағашыбай Күркенов. Қараусыз қалған бірнеше ұлттың балаларын ата-аналық мейірімге шомылдырып, бақытты етіп отыр­­ған Нұрлан мен Гүлжауһар Тө­ле­геновтердің отбасына қандай сый­лық та лайық. Нәзира ЖӘРІМБЕТОВА, «Егемен Қазақстан». ҚОСТАНАЙ.