Таразда оқыту технологиясын жетілдіруге байланысты семинар өтті

ТАРАЗ. 16 қазан. Тараз қаласында «Оқыту бағдарламалары мен мазмұны, оқыту технологиясын жетілдіру» республикалық семинар-тренингі өтті. Бұл туралы egemen.kz тілшісі хабарлады. Іс-шараға Мәдениет және спорт министрлігі тілдерді дамыту және қоғамдық-саяси жұмыс комитеті мұрындық болды. Бұл семинар-тренингтің мақсаты – мемлекеттік тілді ересек адамдарға үйрететін оқытушылардың кәсіби біліктілігін жетілдіру, онлайн әдісімен озық тәжірибелерді алмасу және мемлекеттік тілді оқыту орталықтарының оқытушыларын ынталандыру болып табылады. Семинар-тренингке әдіскер ғалымдар, тіл мамандары, тіл үйренушілер, Астана, Алматы қалалары және облыс орталықтарындағы мемлекеттік тілді оқыту орталықтарының басшылары мен оқытушы әдіскерлері қатысты. Ш. Шаяхметов атындағы тілдерді дамытудың республикалық үйлестіру-әдістемелік орталығының директоры, филология ғылымдарының кандидаты Ербол Тілешов мемлекеттік тілді оқытудың тиімді технологиялары мен әдіс-тәсілдері туралы баяндама жасап, әдіскерлер өз ойларын ортаға салды. Сондай-ақ, Жамбыл облысы тілдерді дамыту басқармасы мемлекеттік тілді оқыту орталығының үздік оқытушылары панорамалық сабақтар мен онлайн режимінде шеберлік сабақтарын көрсетті. Оралхан Дәуіт. Дерек: egemen.kz. Сурет: nalogikz.kz.