Туған сәтінде салмағы небәрі 450 және 530 грамм ғана болған кішкентай жыртқыштар бүгінде көзге көрінердей жетіліп, 3 килоға жуықтаған. Жолбарыс тұқымының табиғатынан жалғыз жүретін қасиетін ескерсек, оларды жұптастыру, аналық жолбарыстың күйзелісін азайтып, сау ұрпақ алу – ұзақ дайындық пен мұқият күтімді талап ететін үлкен еңбек.
Әсіресе алғашқы айлар ең жауапты кезең саналады. Жаңа туған шөнжіктердің иммунитеті әлсіз, сыртқы дыбыс пен артық қозғалысқа тым сезімтал келетіндіктен, тусымен олар арнайы оқшауланған, тыныш аймақта қаралды. Мұндай жайлылық аналық жолбарыс Мияның мазасызданбауына және марғаулардың қалыпты жетілуіне мүмкіндік берген.
«Шөнжіктердің хал-жағдайы ұдайы қадағаланып отыр. Біздің зообақта Мия атты жолбарыс екінші рет күшіктеді. Қан тазалығы мен тұқым сапасын сақтау мақсатында алдағы уақытта басқа хайуанаттар бақтарымен жолбарыс алмасып, популяцияны көбейту жоспарда бар», дейді хайуанаттар бағының жыртқыш аңдар бөлімінің басшысы міндетін атқарушы Айтбек Бәкібайұлы.
Амур жолбарысы – әлемдегі ең ірі әрі сирек кездесетін жыртқыштардың бірі. Табиғатта оның саны тым шектеулі болғандықтан, әрбір жаңа туған шөнжік – маңызды жаңалық.
Бұл оқиғаның еліміз үшін маңызы тіптен бөлек. Қазіргі уақытта кезінде жойылып кеткен Тұран жолбарысының тарихи мекенін қалпына келтіру мақсатында Іле – Балқаш өңірінде Амур жолбарысын жерсіндіру жобасы жүзеге асып жатыр. Ғалымдар бұл екі жолбарыс популяциясының табиғи-генетикалық тұрғыдан бір-біріне өте жақын екенін жиі алға тартады. Сондықтан бір жағынан Іле – Балқаш аймағында тарихи мекенді қайта жаңғырту жұмыстары жүрсе, екінші жағынан, Қарағандыда Амур жолбарысының жаңа ұрпағының өсіп жетілуі – елдегі биоалуантүрлілікті сақтау жолындағы ізгі қадамдардың үндестігі іспетті.
Қарағанды облысы
