видеодан алынған кадр
Куәгерлердің айтуынша, олар жол бойында қолында балғасы бар ер адамды көрген. Оның жанында тұрған әйел итке тиіспеуін өтінгенімен, ер адам жануар жатқан жерге қарай бет алған. Біраз уақыттан кейін ол итті балғамен ұрып өлтіріп, кейін жануардың денесін сүйреп әкеткен.
– Біз жолда кетіп бара жатып, қолында балғасы бар ер адамды байқадық. Жанындағы әйел оны тоқтатуға тырысты. Алайда ол ит жатқан жерге барып, кейін жануарды өлтірді. Содан соң денесін сүйреп алып кетті. Біз бірден полиция шақырдық, – дейді оқиға куәгерлері.
Оқиға орнына келген полиция қызметкерлері ер адамның жеке басын анықтап, түсініктеме алғаннан кейін оны бөлімшеге жеткізді.
Бұл жағдай қала тұрғындарының арасында үлкен наразылық тудырды. Көпшілік жануар ауыр халде немесе қартайған болса да, оны мұндай қатыгез тәсілмен өлтіруге болмайтынын айтып, әрекеттің заң мен адамгершілік қағидаларына қайшы екенін атап өтті.
Қазір оқиғаның барлық мән-жайы анықталып жатыр. Тиісті органдар болған жағдайға құқықтық баға береді.
