Өңірде ұйымдастырылған жалпыхалықтық сенбілікке шаһар жұрты бір кісідей белсенді қатысты. Ауқымды шараға облыс әкімі Ербол Қарашөкеев те үлес қосып, облыс жұртшылығының экологиялық мәдениетін қалыптастыруда аталған акцияның орны ерекше екенін атап өтті.
«Мемлекет басшысы атап өткендей, бүгінде патриотизм нақты істен, әркімнің жеке жауапкершілігінен көрініс табады. «Таза Қазақстан» экологиялық акциясы тұрғындардың бойында туған жерге деген құрметті арттырып, қоршаған ортаға жауапкершілікпен қарауды қалыптастырады», деді Е.Қарашөкеев.
Жалпы саны 600-ге жуық адам қатысқан экологиялық акция аясында Тараз қаласына қарасты «Қызылабад» тұрғын алабында 10 мың қара тал егілді. Жауапты тұлғалардың айтуынша, мұндағы жұмыс бірреттік іс-шарамен тоқтап қалмақ емес. Биыл бұл аумақта 20 мың түп көшет отырғызу жоспарланған. Қалған 10 мың көшет күз мезгілінде егіледі. Бұдан бөлек, Тараз жұрты «Қарасу-2» каналының бойындағы тазарту жұмысына қатысып, тұрмыстық қалдықты жинады.
Тазалық жұмысы Жамбыл, Сарысу аудандарында да өтті. «Мөлдір бұлақ» акциясы аясында өткізілген сенбілікке жергілікті тұрғындар белсенді қатысты. Акцияның мақсаты – табиғи су көздерін қорғау, бұлақ пен өзен-көлді қоқыстан тазарту, сондай-ақ жастардың бойында табиғатқа жанашырлық пен экологиялық мәдениетті қалыптастыру.
Сарысу ауданындағы сенбілік Түркістан ауылдық округіне қарасты «Көсегенің көк жоны» аумағында ұйымдастырылды. Іс-шараға Сарысу ауданының әкімі Сәкен Мамытов, аудандық ардагерлер және қоғамдық кеңес мүшелері, этнос өкілдері мен жастар атсалысты. Қатысушылар алдымен «Қамыр әулие» кесенесіне зиярат етіп, Құран бағыштады.
Жамбыл ауданында экологиялық акция Айша бибі ауылдық округіне қарасты Әулиекөл аумағында өтті. Іс-шара барысында бұлақ көзі ашылып, айналасы абаттандырылды, сондай-ақ ағаш отырғызылды. Дереккөздерге жүгінсек, бұл аумақта ілгеріде 11 бұлақ көзі болған. Соның бірі қайта ашылып, ел игілігіне берілді. Ауыл тұрғындарының айтуынша, бұл бастама өңірді көгалдандыруға, төрт түліктің жайылымын жақсартуға оң ықпал етеді.
«Экологиялық іс-шараға әсіресе жастардың белсенділік танытып жатқаны көңіл қуантады. Еліміздің, өңіріміздің таза әрі жасыл аймаққа айналғанын бәріміз құптаймыз. Осы бағыттағы жұмыстың үздіксіз жалғасатынына сенеміз. Бұл қадам тұрғындардың бойында экологиялық мәдениетті қалыптастыруға айтарлықтай ықпал етеді», дейді белсенді жастың бірі Жақсылық Гаухарбек.
Сондай-ақ дәл осындай акция Жуалы ауданында да ұйымдастырылды. Аудан тұрғындары Ш.Мұртаза атындағы саябақта, Жастар саябағында, Талапты ауылында көгалдандыру, тазалық жұмысын жүргізді. Жалпы, ауданда санитарлық тазалықты қамтамасыз ету бағытында жүйелі жұмыс қолға алынған. Жыл басынан бері Жуалы ауданында бірнеше сенбілік ұйымдастырылды. Елді мекендердегі арық жүйелері тазартылып, 460 тонна күл-қоқыс шығарылды.
Жамбыл облысы
