Болашағы зор осы нысанға ат басын бұрған туристер түтіні өрге будақтаған сары самаурынның шайынан дәм татуға асығады. Себебі самаурынның шайы таулы өңірдің салқын ауа райында бойды жылытса, жазда шөл басары анық. Біз де буы будақтай қайнап тұрған жез самаурынға таяп, иесінен біраз мәліметтің сырына қанықтық.
«Бұл біздің әулеттің жәдігері саналады. Қолданыста жүргеніне шамамен 80 жылдан асыпты. Аналарымыз көздің қарашығындай сақтап, ұрпақтан-ұрпаққа аманат етіп келеді. Тарихы терең самаурын отбасына ғана емес, жыл он екі ай алыс-жақын шетелден ағылған мыңдаған туристке қызмет етіп тұр. Шай ішіп қана қоймай, естелік үшін суретке түсіп жатады», дейді оттығына ағаш жаңқаларын салып жатқан кәсіп иесі Төлеген Құныпияев.
Осылайша, табиғаттың таңғажайып көрінісін тамашалаушы туристерге қазақтың шай ішу дәстүрін дәріптеуге де үлес қосып жүрген азаматтардың ісіне береке берсін дейміз.
Алматы облысы,
Кеген ауданы
